Avannaata Kommuniani borgmesterip Danmarkimi Tyskit ambassadøriat (aallartitaat) Anke Meyer, taassumalu tusagassaqartitsinermut pisortaa Michael Reiter kaffisoqatigalugit naapisimaarsimavai.
Ataatsimiinnermi ambassadørip ilaatigut Ilulissani inuuneq Kalaallit Nunaatalu avannaani pissutsit apersuutigisimavai. Taassuma ilaatigut tusarusussimavaa Kalaallit Nunaanni innuttaasunut ulluinnaat qanoq ittuunersut borgmesterip qanoq nalilernerai.
Periarfissaq iluatsillugu borgmesterip eqqaasitsissutigaa inoqarfinni Ilulissat avannaatungaaniittuni pissutsit annertunerusumik eqqumaffigineqarnissaat pisariaqartoq.
”Avannaatungitsinni illoqarfiit nunaqarfiillu kusanartorsuit tikikkaanni takusariaqarpoq, nunatsinni naligiimmik pinnittoqanngitsoq. Innuttaasut peqqinnissaqarfimmut ungasittorujussuarmiipput, qissallaannartakkamik imeqarniarneq qaqutigoorpoq. Nunaqarfinni ineriartorneq arriippoq, aamma takutikkusupparput inuit taakku siunissamut aningaasaliiffigisariaqartut, siunissarigatsigit aamma”, borgmesterip Ambassadøri Anke Meyer oqaluttuuppaa.
Ane Meyer Ilulissanut ulluinnarlugu tikeraarpoq illoqarfik takujumallugu innuttaasunillu borgmesterimillu naapitsiniarluni.
Borgmesterip ambassadøri kajumissaarpaa tulliani illoqarfiit nunaqarfiillu avannaaniittut takuniaqqullugit.
”Taavani nuannersorpassuaqarpoq, aammali eqqarsaammernartorpassuaqarpoq, nunami ataatsimi inuuniarnermi atugassarititaasut qanoq assigiinngitsigineri pillugu.” taama oqarpoq borgmesteri.