Kommunimut pilersaarummut tapiliussaq nr. 67 pillugu siunnersuut, qitiusoqarfik “Arsarnersiorfik”, Ilulissat
Avannaata Kommunia Ilulissani Arsarnersiorfimmik nutaamik pilersitsiniarluni suliaqarpoq, taanna illoqarfiup kulturikkut neqeroorutaanut ilaatinneqassaaq, arsarnerillu pillugit paasissutissiisarfittut atorneqassalluni.
Taamaattumik Ilulissani qitiusoqarfik nutaaq 1200-C33 pillugu kommunimut pilersaarummut tapiliussassamut siunnersuut tamanut ammasumik tusarniaassutigineqarpoq.
Kommunimut pilersaarummut tapiliussaq sanaartornermut kiisalu misigisassarsiorluni pisuinnarnut aqqutissiamut pilersaarusiornikkut tunngavissiissaaq.
Kommunimut pilersaarummut tapiliussaq nr. 67 pillugu siunnersuut, ILU1200-C33, 27.04.2026 -miit 22.06.2026ilanngullugu tamanut ammasumik tusarniaassutigineqarpoq.
Kommunimut pilersaarummut tapiliussaq nr. 67 pillugu siunnersuut
Tusarniaanermut atatillugu akerliliissuteqassaguit imaluunniit oqaaseqaatissaqaruit, taakku kommunimit kingusinnerpaamik ulloq 22.06.2026 tiguneqareersimassapput.
Kommunimut pilersaarummut tapiliussap siunertaa
Kommuni Ilulissani Kangiata Illorsuanut Sermermiunilu iliveqarfitoqqamut qanittumi Arsarnersiorfimmik nutaamik pilersitsiniarpoq.
Arsarnersiorfimmi arsarnerit pinngortitami pisartut pillugit pinngortitalerinermut kulturikkullu oqaluttuarisaanermut tunngasut saqqummiunneqartassapput. Tamatumunnga atatillugu meeqqat atuarfianni atuaqatigiit angajulliit atorsinnaasaannik atuartitsissutaasinnaasumik ilaqarnissaa eqqarsaatigineqarpoq.
Immikkuullarissumik isikkoqarnermigut nunamullu inissisimanermigut pilersaarut illoqarfiup innuttaanit takornarianillu takuniarneqartartut ilagilissavaat, illulioriaaserlu issittumut immikkut isikkulerlugu pilersinneqartussaammat Ilulissat ilisarnaataasa ilaattut inissisimalerumaarpoq.
Immikkoortortap iluani Arsarnersiorfimmut sanaartorfissaq ataaseq periarfissinneqassaaq, taanna 250 kvm-it inorlugit annertussuseqassaaq.
Aamma immikkoortup iluani misigisassarsiorluni pisuffissiaq, saniatigullu ataatsimoorussamik sunngiffimmi atortulersuutit soorlu majuartarfiit issiaviillu nunallu ilusilersugaanera pilersinneqarsinnaapput. Pisuffissiaq taanna Arsarnersiorfimmut atatillugu pilersinneqassaaq, tassanilu katersuuttarfissat aqqusiap avataaniittut ukiup ingerlanerani qilammi pisartunik attuumassuteqassallutik, soorlu Ullortunersiortarfik, il.il., pinngortitamilu misigisassanik nutaanik periarfissiissallutik.
Matumuuna siunnersuummi immikkoortoq nutaaq 8 hektarit missaannik annertussusilik aalajangersarneqarpoq, immikkoortumit pioreersumit 1200-D09, Ilulissat Kangerluannut illoqarfimmut qanittumi nuna allanngortitassaanngitsumit, ilanngunneqartoq.
Immikkoortup killeqarfia siuliani taaneqartup pisuffissiap inissisimanera naapertorlugu aalajangersarneqarpoq. Allanngortitsinerup kingorna 1200-D09 424 hektarinik annertussuseqassaaq.
Tusarniaaneq
Kommunimut pilersaarummut tapiliussatut siunnersuut sapaatit akunnerini arfineq pingasuni tusarniaassutigineqassaaq. Piffissami tassani kikkut tamarmik — innuttaasut, suliffeqarfiit, sullissiviit, peqatigiiffiit il.il. — akerliliissutinik, oqaaseqaataasinnaasunik allannguutissatullu siunnersuutinik saqqummiussisinnaapput.
Tusarniaanermi akissutit kommunimut toqqaannartumik nassiunneqarsinnaapput kommunimut pilersaarutip nittartagaa aqqutigalugu https://kommuneplania.avannaata.gl/dk/hoeringer/indgiv-hoeringssvar/ e-mailikkut uunga plan@avannaata.gl
Aamma akissutit najukkanni Sullissivimmut tunniunneqarsinnaapput, imaluunniit Kommunimut nassiunneqarsinnaapput.
Tamanut ammasumik tusarniaaneq naammassippat kommunalbestyrelsip akerliliissutit allannguutissatullu siunnersuutit takkussimasut suliarissavai, tamatumalu kingorna kommunimut pilersaarummut tapiliussaq inaarutaasumik akuersissutigineqarsinnaavoq.
Tusarniaanermut atatillugu akerliliissuteqassaguit imaluunniit oqaaseqaatissaqaruit, taakku kommunimit kingusinnerpaamik ulloq 22.06.2026 tiguneqareersimassapput.
