Kommunimut pilersaarummut tapiliussaq nr. 68 pillugu siunnersuut, qitiusumik immikkoortortaq “Illumiut Qaqqaat - Mathias Storchip Aqqutaa”, Ilulissani
Ilulissani inissianut annertuumik pisariaqartitsineq tunngavigalugu Ilulissani qitiusumik immikkoortortaq nutaaq 1200-C34 pillugu kommunimut pilersaarummut tapiliussaq nr. 68 siunnersuutigineqartoq tamanut ammasumik tusarniaassutigineqassaaq. Kommunimut pilersaarummut tapiliussaq aqqutigalugu Mathias Storchip Aqqutata kujataatungaani nutaamik sanaartortoqarsinnaalissaaq.
Kommunimut pilersaarummut tapiliussaq nr. 68 pillugu siunnersuut, ILU1200-C34, 22.04.2026-miit 17.06.2026 ilanngullugu tamanut ammasumik tusarniaassutigineqarpoq.
Kommunimut pilersaarummut tapiliussaq nr. 68 pillugu siunnersuut
Kommunimut pilersaarummut tapiliussap siunertaa
Kommunimut pilersaarummut tapiliussaq suliarineqartariaqalersimavoq, Ilulissani inissianut sanaartorfissanullu ujartuineq annertusiartuinnarmat. Kommunalbestyrelsi ujartuinerup naammassiniarnissaanik suliaqarpoq, illoqarfiup pioreersup iluani sumiiffinni arlalinni nutaanik sanaartornissamut periarfissanik pilersitsinikkut kiisalu illoqarfik avannamut annertusarlugu.
Matumuuna siunnersuut aqqutigalugu illoqarfiup kujataata kitaatungaani qitiusoqarfik nutaaq immikkoortinneqassaaq, tassani illulioriaatsit atorneqariaatsillu assigiinngitsut periarfissinneqarlutik. Sumiiffik tamanna Ilulissani eqiterilluni sanaartornermut pilersaarummi politikkikkut akuersissutigineqarsimasumi nutaamik sanaartorfigineqarsinnaasutut siumut aalajangersarneqareersimavoq.
Sumiiffik immikkoortunut pingasunut agguarneqassaaq. Immikkoortoq 2-mi portusuunik inissialiornissamut sanaartorfissanik marlunnik immikkoortitsisoqassaaq, taakkunannga ataaseq kommunip illuutinut ingerlatseqatigiiffiata Avannaa Development A/S-ip inissianut suliniutaanut immikkoortinneqassalluni, ininilu allerni innuttaasunut atugassanik periarfissaqartitsilluni.
Immikkoortoq 1-ip iluani akulikitsumik pukkitsunik illuliornissamut 6.000 kvm-inik, inissianut 75-inut naapertuuttunik, sinneruttumik periarfissaqarpoq, tassani qitiusoqarfiup atuuffiinik akuleriissitanik periarfissaqarluni. Immikkoortoq 3-p iluani quleriinni inissiani inissianut 55-inut, annerpaamik pingasunik quleriilinni, sinneruttumik periarfissiisoqarpoq.
Matumuuna siunnersuut aqqutigalugu immikkoortoq nutaaq aalajangersarneqassaaq, taanna immikkoortunit pioreersunit ilanngunneqartunik katillugit 10 hektarit missaannik annertussuseqarpoq. Taamaattumik immikkoortut 1200-D02 aamma 1200-C05 katillugit taamaaqataanik annikillisinneqassapput.
Tusarniaaneq
Kommunimut pilersaarummut tapiliussatut siunnersuut sapaatit akunnerini arfineq pingasuni tusarniaassutigineqassaaq. Piffissami tassani kikkut tamarmik — innuttaasut, suliffeqarfiit, sullissiviit, peqatigiiffiit il.il. — akerliliissutinik, oqaaseqaatinik allannguutissatullu siunnersuutinik saqqummiussisinnaapput.
Tusarniaanermi akissutit kommunimut toqqaannartumik nassiunneqarsinnaapput kommunimut pilersaarutip nittartagaa aqqutigalugu https://kommuneplania.avannaata.gl/dk/hoeringer/indgiv-hoeringssvar/ imaluunniit e-mailikkut uunga plan@avannaata.gl
Aamma akissutit najukkanni Sullissivimmut tunniunneqarsinnaapput, imaluunniit Kommunimut nassiunneqarsinnaapput.
Tamanut ammasumik tusarniaaneq naammassippat kommunalbestyrelsip akerliliissutit allannguutissatullu siunnersuutit takkussimasut suliarissavai, tamatumalu kingorna kommunimut pilersaarummut tapiliussaq inaarutaasumik akuersissutigineqarsinnaavoq.
Tusarniaanermut atatillugu akerliliissuteqassaaguit imaluunniit oqaaseqaatissaqaruit, taakku kommunimit kingusinnerpaamik ulloq 17.06.2026 tiguneqareersimassapput.