Matumuuna Ilulissani qitiusoqarfimmut nutaamut kommunimut pilersaarummut tapiliussassatut siunnersuutip tamanut tusarniutigineqarnera nalunaarutigineqarpoq. Kommunimut pilersaarummut tapiliussaq qitiusoqarfissatut siunertanut illoqarfiup qanittuani sanaartornissamut periarfissanik nutaanik arlalinnik periarfissiivoq.
Kommunimut pilersaarummut tapiliussassatut siunnersuut nr. 69, ILU1200-C32, piffissami 16.06.2026-imiit 11.08.2026 ilanngullugu tamanut tusarniutigineqartussanngorlugu saqqummiunneqarpoq.
Kommunimut pilersaarummut tapiliussassatut siunnersuut nr. 69-imut linki
Kommunimut pilersaarummut tapiliussap siunertaa
Ilulissani sanaartornissamut nunaminertanik pisariaqartitsinerup naammassiniarnissaa siunertaralugu kommunip qitiusoqarfimmut nutaamut kommunimut pilersaarummut tapiliussassatut siunnersuut manna suliarisimavaa. Immikkoortumi sanaartorfissat arlallit assigiinngitsunut atorneqarsinnaasut immikkoortinneqarput, matumani ilanngullugit kiffartuussinermik inuussutissarsiorneq, hoteli aamma inissiat.
Immikkoortoq Ilulissani eqiterutsitsinissamik pilersaarummi politikkikkut akuerineqarsimasumi, sanaartorfissatut nutaat inissinneqarsinnaaffigisaasa ilaattut toqqarneqarsimavoq. Illoqarfiup avannaatungaani, imeqarfiup eqqaani, Paulus Kristensenip Aqqutaata tallissutaatut inissisimavoq, ullumikkullu sanaartorfiusimanngilaq pinngortitamisullu isikkoqarluni. Inissisimaffia illoqarfimmut qanittumiippoq, imeqarfiullu illersorneqarnissaanut killilersuiffiup avataaniilluni, taamaattumillu illoqarfiup allilerneqarnissaanut naleqquttutut isigineqarluni.
Sanaartorfissat eqimattakkuutaarlugit immikkoortinneqassapput, immikkoortullu pitsaasumik sanaartorfigineqarnissaa qulakkeerneqarsinnaaqqullugu immikkoortukkuutaartumik tamanut nalunaarutigineqartassallutik. Sanaartukkat uigulukuttunik aamma quleriilinnik portunerusunik illunik akuleriissillugit sanaartorneqassapput. Kommunimut pilersaarummut tapiliussami ilaatigut sanaartornerup annertussusia avataaniillu isikkua pillugit aalajangersakkat, kiisalu nunaminertat immikkut ittut innuttaasunut sammitinneqartumik inuussutissarsiornermut atorneqartussat pillugit aalajangersakkat ilaapput.
Sanaartorfissat 1.1, 1.2, 1.3 aamma 1.4 Avannaata Kommuniata inissialiorfissaatut immikkoortinneqassapput.
Sanaartorfissaq 1.5 Naalakkersuisut kollegialiorfissaattut immikkoortinneqassaaq.
Sanaartorfissat 2.2, 2.3, 2.4 aamma 2.5 Avannaa Development A/S-ip inissialiorfissaatut immikkoortinneqassapput.
Sanaartorfissaq 2.6 Nukissiorfiit pilersuinermut atortulersuutaanut immikkoortinneqassaaq.
Tusarniaaneq
Kommunimut pilersaarummut tapiliussassatut siunnersuut sapaatip akunnerini 8-ni tusarniutigineqassaaq. Piffissami tassani tamarmik – innuttaasut, suliffeqarfiit, ingerlatsiviit, peqatigiiffiit il.il. – akerliliissutinik, oqaaseqaatinik allannguutissatullu siunnersuutinik saqqummiussisinnaapput.
Tusarniaanermut akissut kommunimut toqqaannartumik kommunimut pilersaarutip nittartagaatigut allassinnaavat: https://kommuneplania.avannaata.gl/dk/hoeringer/indgiv-hoeringssvar/ imaluunniit e-mailikkut uunga nassiullugu:
plan@avannaata.gl. Akissutit aamma najukkanni Sullissivimmut tunniussinnaavat imaluunniit Kommunimut nassiussinnaallugu.
Tamanut saqqummiussinerup kingorna Kommunalbestyrelsip akerliliissutaasinnaasut allannguutissatullu siunnersuutit suliarissavai, tamatumalu kingorna kommunimut pilersaarummut tapiliussaq inaarutaasumik akuerineqarsinnaalluni.
Tusarniaanermut akerliliissutissaqaruit imaluunniit oqaaseqaatissaqaruit, taakku kingusinnerpaamik 11.08.2026 kommunimit tiguneqareersimassapput.
