Aasarpoq tamannalu isumaqarpoq ukiuunerani eqqakkat ikuallanneqarsinnaasut naqittaallugit inikillisitat aamma poorsuarnut qaqortunut poortukkat – assartuunneqarnerat aallarteriivissimasoq.
Katillugit poorsuit 960-it, tassa 659 tons-it umiarsuaq MV Vestborg atorlugu Ilulissaniit nassiunneqarsimalereerput. Umiarsuup eqqakkat Sisiminut assartussavai, tassanilu eqqakkanik ikuallaavimmi ikuallanneqassapput ikuallanneqarneraniillu nukik atorluarneqassalluni.
Aasap ingerlanerani ingerlaavartumik Upernavimmiit, Uummannamiit aamma Ilulissaniit eqqakkanik ikuallanneqarsinnaasunik assartuussinerit pissapput, eqqaavissuarni eqqakkat annikillisarniarlugit. Ilulissani eqqaavissuarmi sulisut ullormut poorsuarnik 100-nik poortuisinnaapput.
Saviminikut annertuut Islandimut nassiunneqassapput
Tamatuma saniatigut saviminikut amerlasuut atoqqitassanngorlugit Island-imut assartorneqassapput. Ilulissaniit, Upernavimmiit aamma Uummannamiit saviminikut toqqaannarlutik assartorneqarumaarput, Qaanaamiilli saviminikut containerinut poortorneqariarlutik Royal Arctic Line aqqutigalugu assartorneqarumaarput.
Anguniagaavoq ukiorpassuarni saviminikut amerliartuinnavissimasut piiarnissaat taamaasillutik illoqarfiit eqqaavissuini tamani savimikut tamarmik ingerlaavartumik ikilisikkiartorneqarniassammata.
Avannaata Kommuniani sulisut maannakkut assartuinissamut atortussatik piareersaleruttorpaat taamaasilluni aasaanerani suliaqarneq eqaatsumik ingerlanneqarluni naammaasineqarniassammat.
Ukioq kingulleq Avannaata Kommunia Upernavimmit, Uummannamit aamma Ilulissanit eqqakkat ikuallanneqarsinnaasut katillugit 4.000 tons-it aallaruppai.
