Uummannami innaallagissiorfiup ikuallannerata kingunerisaanik ullup unnuallu kingulliup ingerlanerani Uummannami innaallagiamik pilersuineq attaveqaateqarniarnerlu eqqugaasimapput.
Taamaattumik innuttaasut katersortarfitoqqami katersuussimapput, tassani kaffi tiilu sassaalliutigineqarlutik, oqarasuaatinillu angallattakkanik immiisoqarsinnaalluni.
Ullumikkut, marlunngornermi, innuttaasut naapissapput kalaaliminernik nassarlutik, taamaalilluni kikkut tamarmik nerisassaqarsinnaaniassammata.
Unnugu Uummat Uummannaq illoqarfimmi innuttaasunut nerisassiorniarpoq. Innuttaasut nerisassanik kissartunik iganissamut periarfissaqanngitsut katersortarfitoqqami nereqataarusukkunik tikilluaqqusaapput.
Paneeraq Zeeb kajumissutsimik sulisut akornanniippoq, piareersimallunilu ataqatigiissaarinermi ikiortassalluni.
"Uummat Uummannaq Peqatigiiffik ullumi pisiniartut ikiorpakka. Aamma ippassaq ikiueqataavunga kajumissutsimik sulisut allat marluk, Ane Zeeb Pjettursson aamma Aviaaja Sigurdsen peqatigalugit. Suleqatigiinneq pilersissimasarput assut nuannaarutigaarput, peqatigiiffiit, Pilersuisoq aamma Cafémma akornanni," Paneeraq Zeeb oqaluttuarpoq.
Avannaata Kommuniata kajumissutsiminnik suleqataasorpassuit, pissutsini maanna atuuttuni innuttaasunik upalungaarsimanermillu ikiuuttut, qutsavigai.
Kommunimi sulisut katersortarfitoqqami najuupput, innuttaasunillu ikiuinissamut piareersimallutik.
