Takornariaqarneq qanoq ililluta amerlanerusunut iluaqutaalersissinnaavarput – Ilulissaniinnaanngitsoq,
Avannaata Kommunianili tamarmi?
Apeqqut taanna takornariaqarneq pillugu inuussutissarsiornermut isumasioqatigiinnermi oqallinnerni tamani qitiuvoq, politikerit, takornariaqarnermik ingerlataqartut, inuussutissarsiortut kommunimilu sulisut immikkut ilisimasallit inuussutissarsiummi sukkasuumik ineriartorfiusumi periarfissat unammilligassallu oqallisiginiarlugit naapimmata.
"Takornariaqarneq Avannaata Kommunianut annertuumik periarfissaqarpoq. Ineriartornerup najukkani inuiaqatigiinnut iluaqutaanissaa kommunimilu tamarmi innuttaasunut inuussutissarsiortunullu naleqalersitsillunilu periarfissiitsinissaa qulakkiissallugu suliassarivarput", borgmesteri Lars Erik Gabrielsen inuussutissarsiornermut isumasioqatigiinneq ammaramiuk oqarpoq.
Periusissiamiit najukkani periarfissanut
Visit Ilulissaniit oqariartuut aamma ersarippoq: Avannaata Kommuniani tamarmi innuttaasunut, inuussutissarsiortunut tikeraartunullu najukkani piviusumik naleqalersitsinissaq anguniagaavoq.
Tamanna anguneqassappat politikkikkut anguniakkat, kommunip periusissiaa, Visit Ilulissat suliaa takornariaqarnerullu namminersorlutik inuussutissarsiortunut periarfissanik pilersitsisinnaanera erseqqissumik imminnut ataqatigiissinneqartariaqarput.
Visit Greenlandip pisortaata Karsten Høyp takornariaqarnermik namminersorlutik ingerlataqartut suliffeqarfimminnik ingerlatsillutillu ineriartortitsinissamut sapinngisamik pitsaanerpaamik atugassaqartinneqarnissaat suliassatut pingaarutilittut tikkuarpaa.
Visit Ilulissaniit pilersaarutigineqarpoq nunap immikkoortuani illoqarfiit nunaqarfiillu tikeraarlugit angalassaaq. Takornariaqarneq Ilulissaniinnaq ineriartortinneqarnani kommunimi sumiiffinni amerlanerusuni periarfissanik pilersitsissasoq anguniarneqarpoq.
Tassani Nalik Venturep suleqatigineqarnera aamma politikkikkut suliniutaavoq, innuttaasut inuussutissarsiummik ingerlatsisutut tunngavissaqalernissaannik ikiuutaasussaq.
Kommunalbestyrelsimi ilaasortat takornarialerisullu inersuarmi apeqqutissaaleqinngeqaat.
Siuariartorneq pitsaasunik sinaakkutissaqartariaqarpoq
Takornariaqarnerup ineriartortinneqarnerani takornariat amerlanerulernissaat kisiat pineqanngilaq. Aamma sumiiffiit takornariat ornittagaat – inuillu taakkunani najugaqartut – pineqarput.
Teknikkimut Ingerlatsivimmi illoqarfimmik pilersaarusiortoq Ilulissani Uummannamilu siunissamut ungasinnerusumut illoqarfinnut pilersaarutit kiisalu Upernavimmut pilersaarummik suliaqarneq pillugit oqaluttuarpoq. Pilersaarutit Kommunalbestyrelsimit ilaasortaasarsimasunillu ukiut arlallit siumut isigaluni illoqarfiit alliartornissaat eqqarsaatigalugu suliarineqarput.
Taamaalilluni illoqarfiit ineriartornissaannut sinaakkutissat siumut eqqarsaatigineqareerput, inuussutissarsiutinut nutaanut inissaqartitsillunilu inissianik, attaveqaasersuutinik innuttaasullu ulluinnarni inuunerannik mianerinnilluni ineriartortoqarsinnaaqqullugu.
Namminersortut aningaasaliiumassuseqarnerat ajornartorsiutit ilagaat. Aningaasaliiumasut amerlagisassaanngillat, isumasioqatigiinnermilu oqaatigineqarpoq maanna aningaasaliinissamut periarfissat kajuminnartut killeqartut.
Umiarsuit takornariartaatit pillugit aamma apeqquteqartoqarpoq. Umiarsuit takornariartaatit qanoq ittut qassillu tikittarnissaat kissaatigineqarpa – najukkanilu qanoq annertutigisumik naleqalersitsisarpat? Visit Ilulissat takornariartaatinik umiarsuaatileqatigiiffinnik oqaloqateqartarpoq, nunallu immikkoortuata ersarinnerusumik nittarsaannissaa sulissutigalugu.
Borgmesterip kissaatigaa nunap immikkoortuanut tikinnissaq takornariartaatinut umiarsuarnut angisuunut aamma orniginartuussasoq.
Timmisartukkut angallannermi periarfissat nutaat – silali suli apeqqutaasarpoq
Ilulissani mittarfissuartaassaq, 29. oktober 2026 ammartussaq, takornariaqarnermi periarfissanik aamma allannguissaaq.
Air Greenlandip pisortaanera Jacob N. Sørensenip naatsorsuutigaa aasaanerani sapaatip akunneranut arfinileriarluni timmisartuussisoqartassasoq, kisianni taassuma aamma Greenland Airportsip pisortaanerata Jens Lauridsenip erseqqissarpaat mittarfiup iluatsilluarnissaa timmisartuussinerit amerlassusiinnaannik tunngaveqanngitsoq. Unammilligassaq annerpaatut isigisaat tassaavoq unnuiffissat ikippallaarnerat.
Isumasioqatigiinneq naggaserlugu ullormi peqataasut panelimi oqallipput. Tassani inuussutissarsiortut kissaataat alla qaqeqqinneqarpoq: Timmisartut Ilulissanit suli usinik inissaqarlutik aallartut nassiussanik amerlanerusunik assartuisinnaappat?
Periarfissaq ingasaallugu isumalluarfigineqassanngitsoq Air Greenlandip erseqqissarpaa. Timmisartumi inissaq sinneruttoq nassiussanik akikitsumik assartuisoqarsinnaaneranik isumaqanngilaq, nassiussanullu akit suliffeqarfippassuit periarfissamik taassuminnga atuilernissaannut naammattumik apparnissaat ilimananngitsoq oqaatigineqarpoq.
Tamatumuunakkut ullormi oqariartuutit pingaarnerit ilaat aamma erseqqissarneqarpoq: Angallannikkut attaveqaatit nutaat takornariaqarnerullu annertusiartornera periarfissanik pilersitsipput, ineriartornerli nammineerluni taakkunneq ajorpoq.
