Avannaata Kommunia suleqatigalugu illoqarfiup avataani immap naqqani eqqakkat qassutillu annaaneqarsimasut qallorneqarnissaat anguniarlugu siunnerfilimmik suliniuteqartoqarpoq.
Saliineq aalisartut namminneq misilittagaannik najukkamilu pissutsinik ilisimasaannik tunngaveqarpoq. Tassani aalisartut namminneq suliaq qaqugu ingerlanneqassanersoq ataqatigiissartarpaat.
Taamaaliornikkut saliineq eqaatsumik aaqqissuunneqarsinnaavoq, silap qanoq innera aamma imaani najukkami pissutsit eqqarsaatigalugit.
Angallatit anginerusut marluk saliinermi peqataapput, umiatsiaaqqallu pisariaqartitsineq naapertorlugu aggersarneqarsinnaapput, assersuutigalugu oqimaannerusunik piiagassaqartillugu imaluunniit assartugassaqartillugu.
Eqqakkat qallorneqartut Uummannamut nunamukaanneqartarput, tassanilu ingerlaqqittumik suliarineqassallutik.
Saliineq aqqutigalugu aalisartut Uummannap eqqaani imaani avatangiisit minguitsuutinnissaannut peqataapput, peqatigisaanillu eqqakkat imaani avatangiisinut imaanilu uumassusilinnut ajoqusiisinnaasut qallorneqarlutik.
Avannaata Kommuniata Naalakkersuisullu Avatangiisinut Aningaasaateqarfiat imartani qaleralinniarfinni immap naqqata salinneqarnissaanut aningaasaliisuupput.
Avannaata Kommuniata aalisartut saliinermut annertuumut peqataasimasut qutsavigerusuppai.