Ilulissani imarpissuaq qulaallugu mittarfittaassaq 2026-mi oktobarip naanerani ammartussaavoq aamma anguniagaavoq takornarianik amerlanerusunik Ilulissanut tikittoqartalernissaa – ukiup qaammataani aamma.
Najukkami takornarialerillutik suliaqartartut arlaqartut workshop-imi peqataapput, tassanilu Visit Ilulissat, Visit Greenland aamma borgmesteri Lars Erik Gabrielsen (S) Ilulissani takornariaqarneq pillugu periarfissanik isummersuutinillu saqqummiipput.
”Atuartut 8.-10. klassimi atuartut atuareernerup kingorna sulisartuuneq pillugu misilittagaqarnissaminnut periarfissaqartariaqarput. Ilisimasariaqarpaat immersueqataanissaat sulisartunngornissaallu pisariaqartikkipput. Ilisimasariaqarpaat uatsinnit pisariaqartinneqarlutik” borgmesteri oqarpoq.
Borgmesteri naapertorlugu pingaaruteqarpoq takornarialerinerup iluani aqqutaasinnaasut periarfissaasinnaasullu pillugit inuusuttut siusissukkut paasitinneqartarnissaat.
Tamatuma saniatigut Ilulissani inuussutissarsiornermut ilinniarfissap nutaap siunissami ineriartortitsinissamut pingaaruteqarluinnarnera oqaatigaa.
”Inuussutissarsiornermut ilinniarfissap ilinniagaqaannarnermit annertuneruvoq. Inuusuttunut periarfissanik nutaanik pilersitseqataasinnaavoq tamatumalu saniatigut takornarialerinermut inuussutissarsiutitsinnik nukittorsaaq
ataalluni.
Neriuppunga tamanna aqqutigalugu ukiuunerani takornarialerinermik ineriartortitseqataasinnasugut.
Meeqqat atuarfianiilli takornarialerinerup iluani inuusuttut misilittagaqalernissaannut periarfissittalerutsigit siunissami imaasinnaavoq takornarialerisutut, umiarsuaaqqap naalagaatut imaluunniit qimussiussisartutut siunissaqalernissaannik takorluuilertissinnaagigut,” Lars Erik Gabrielsen oqarpoq.
Tamatumalu saniatigut inuussutissarsiornermut ilinniarfissaq pillugu Naalakkersuisunik suleqateqarnini ersarissarpaa.
”Ilulissani maani inuussutissarsiornermut ilinniarfissaq nutaaq pillugu Naalakkersuisunik suleqateqarluarpugut. Illoqarfimmi maani takornarialerineq kisiat aallutissanngilarput ineriartorneq kommunitsinni illoqarfinnut allanut aamma siaruarneqassaaq,” Lars Erik Gabrielsen (S) oqaluttuarpoq.