Aalisarnermut inuussutissarsiuteqartut saqqummersitsinermut katersorlugit, tassani atortut, periutsit kiisalu suliatigut ilisimasanik avitseqatigiinnissaq qitiutinneqassallutik.
Avannaata Kommuniata Aalborg Kongres & Kultur Center suleqatigalugu ukioq manna kingumut Polar Expo aaqqissorpaa. Saqqummersitsinermi peqataasut ilaatigut saqqummersitanik takusaqarsinnaapput, suliamut tunngasunik sammisaqartitsinernut peqataasinnaallutik kiisalu aalisarneq ineriartorneralu qitiutillugit saqqummiussanik tusarnaarsinnaallutik.
Borgmester Lars Erik Gabrielsen tikilluaqqusillunilu ammaanermi oqalugiarpoq. Ammaanermi aamma Aalborg Kongres & Kultur Centerip pisortaa Nikolaj Holm kiisalu Aalisarnermut, Piniarnermut, Nunalerinermut Imminullu Pilersornermut Naalakkersuisoq Peter Borg peqataapput.
Borgmesterip ammaanermi oqalugiaataa uani takuuk:
Aluukkut tamassi.
Asasakka ataqqinartut imaani inuussutissarsiuteqartut, suliap uumap piviusunngortinniarneranut suliaqartut, Carlo ilanilu, Aalborg Kongrescenter aammaarluni aaqqissuussinermut annertuumik tapersersuillunilu kivitseqataaneranut qujanaq, aammalu tikilluaritsi.
Avannaata Kommunia ilisimaneqartutuut aaliasarnermik annertuumik ingerlatsiviuvoq, tamannalu maani ullumikkut ersarippoq, Kommunitsinniit allaniillu Kommuniniit najuuttoqarluni, ilissilu inuussutissarsiortuususi immissinnut naapiffittut atortarissi qularnanngilaq.
Aalisarneq allanngoriartorpoq, aamma atortuutitigut, tamannalu maani aamma takuneqarsinnaalluarpoq, qularutigisanngilaralu atorluartarissi, aamma soorunami maani nittarsaassinermi tuniniaasut siunnersuisartullu taamatut atorluartagaralugu.
Mittarfissuaq toqqaannaq niuffaffinnut periarfissiisussaq ammalerpoq, ilisimagaluarlugu tamanna aqagu piunnanngitsoq, kissaappassi sapiissuseqarlusi periarfissanngorumaartussaq misissussagissi sutigut iluaqutigisinnaanerlusiuk.
Avannaani immikkuullarequtigivarput umiatsiannguanik aalisarneq annertummat, angallatit anginngitsut, aammalu raajanik aalisartut maannga tulaassuisut. Politikkikkut isummersuuteqassaguma, taarusuppara taamatut immikkuullarequterput innarlerneqanngisaannassasoq, ullut tamarluinnaasa tulaassuisoqartuarneratigut illoqarfigut pikialaarfiutippaat, amerlaqisullu aalisarnikkut suliasi inuussutigivaat, oqaatigilluaannarlugu tamanna innarlerneqassappat inuiaqatigiinnguatut annertuumik innarlissutigisussaavarput.
Aalisarneq ineriartorpoq, aalisakkat allat aamma ukkatarilluarneqalerput, qujanartumillu akigissaarnerisa Kommunitta ingerlasinnaanera qulakkeersimallugu, suliniutillu ineriartortitsinermut allat, soorlu nutaanik suliffissualiornerit, atorluaarusunneq, isertitaqarusussutsillu qaffassarneratigut aningaasarsiorfiusinnaasut annertusarpaat.
Piniakkat imaani nunamilu killilersugaanngittumik nerisassaqartitsisinnaanerat kissaatiginartut ilagaat, aammalu silarsuatta allanngornera ataavartumik pioreersoq naleqqussarfiulluni aaqqiivigineqartariaqartoq neriuutiginarpoq, tamanna immikkut eqqaalaarusukkiga.
Kaammattorusuppassi imarsuaq inuuniarfigigassiuk, ilissinnut pissuseqarfigisarnersi pitsaanerusariaqartoq, avalattuarpusimi inuuniarlusi, ilussinnili piniutaappata, allatigulluunniit takussaalersimasumik serlersaarisarnerit unilluinnartariaqarput, suummi tamarmik nalitoqaat.
Naggasiutigalugu pinngitsoorusunngilanga, ilaqarassi inuussutissarsiorfigisassi imarsuup aalisartoqatisi aasimasaat, taakkulu eqqaamavagut, eqqaaneqarnerilu ataqqinartuullik.
Ullut makku atorluarisigit, qujanarujussuarlu.