Nunatsinni kinaluunniit misissortinnermi ajoqusersimasut, peqqinnissaqarfimmi sulisumit assigisaanniluunniit katsorsartissimasut, qinnuteqarsinnaatitaapput. Nammineq imaluunniit alla pillugu matumunnga akuersissutaateqaruit qinnuteqartoqarsinnaavoq.
Ajoqusernerit ilaatigut soorlu sivisuumik napparsimanerit imaluunniit aaqqinneqarsinnaanngitsumik ajoquteqalersimanerit pineqarput. Ajornerulersinneqarlutit katsorsartissimassaatit. Allatut oqaatigalugu katsorsartinninni ajoqusersimassaatit. Nunatsinni peqqinnissaqarfimmi katsorsarneqarnivit kingunerisaanik ajoqusersimaguit taarsiissuteqartoqarnissaanik taarsiiffigineqarnissamut qinnuteqarsinnaavutit.
Taarsiissuteqartoqarnissaanik qinnuteqassanersutit nalornissutigigukku, Nunatta nakorsaaneqarfia saaffigisinnaavat, ilitsersuutinik tunitissaatit, ”attaveqarfissaq”-mi saaffiginniffissap paassissutissartai pissarsiarineqarsinnaapput.
Malugiuk:
Peqqinnissaqarfimmi Napparsimasunut siunnersortinut pisumut tunngatillugu misigisannik, apeqqutinut akissuteqarnissannik imaluunniit pisumut tunngatillugu attaveqaruit pitsaassaaq. Napparsimasunut siunnersortinut tunngatillugu paasissutissat uani atuarsinnaavatit, Napparsimasunut siunnersortit suut naammagittaalliutigineqarusunneranut periarfissanut tunngatillugu, taarsiiffigineqarnissamik qinnuteqarnermut (pisut peqqinnissaqarfimmi pisimappata) tunngatillugu ulluinnarni nal. 13:00-miit 15:00-ip tungaannut sianerfigineqarsinnaapput.
Katsorsaavimmi misissorneqarnermi, paasiniaasoqarnermi, katsorsartinnermi assigisaaniluunniit ingerlanneqartumit akisussaaffigineqartumik angajoqqaat qitornaminnit 18-iliineqanngitsumik annaasaqartut ajunngitsorsiaqarsinnaatitaapput. Angajoqqaat annaassaqarnerminnut attuumassuteqartumik ajunngitsorsiaqartinneqassanngillat, taamaattorli qitornamik annaasaqarnermi aningaasartuutigisimasanut,
assersuutigalugu napparsimasutut nalunaarsimanernut imaluunniit tarnip pissusaatigut ikiorneqarnermut aningaasartuutinut ajunngitsorsiassaapput.
Naammagittaalliuuteqarnissamut taarsiivigineqarnissamullu periarfissaat pillugit inatsimmi ajunngitsorsiassat 14. februar 2025 , tassanngaaniillu ajoqusersimanernut atuullutik. Ajunngitsorsiassat meeqqamut angajoqqaatut oqartussaasumut imaluunniit oqartussaasunut tunniunneqassapput. Angajoqqaatut oqartussaassuseqarneq ataatsimoorunneqarpat ajunngitsorsiannut tamarmik immikkut affaanik tunineqassapput.
Ukunani annaasaqarsimassaatit:
Ajoquserneq ilinnut annaasaqaataasimassaaq. Timikkut, tarnip pissusaatigut imaluunniit aningaasaqarnikkut. Annaasaqaatit taakku taarsiissuteqarfigineqarsinnaapput.
Ajoquserneq pissutaalluni aningaasarsianik imaluunniit ajoquserneq pissutaalluni aningaasartuutinik annaasaqaatit pineqarput.
Sulinermi iluanaarutit annaaneri
Sulinermut atatillugu aningaasarsianut annaasanut tunngatillugu sulinermi isertitaqaataasussaagaluanut taarsiissutaasutut paasineqassapput, assersuutigalugu ajoqusersimanermut tunngatillugu suliffeqarfimmik annaasaqarsimaneq imaluunniit napparsimasutut nalunaaruteqarnivit nalaani aningaasarsiaqarsimanngikkuit.
Sulisinnaajunnaarnermik annaasaqarneq
Ajoqusernermi sulinermi aningaassarsiorsinnaanerit apparsimappat taarsiiffigineqarsinnaavutit. Katsorsartinnivit kingunerisaanik ajoqusersimanngitsuuguit akissarsiatigut taamanili isertitassaraluavit annertussusaat matussuserneqarsinnaapput.
Aningaasartuutinik taarsiissuteqarneq
Ajoqusersimanivit kingorna assersuutigalugu nakorsaatinut, pillorissaasunut, ikiuutinut assartorneqarnermullu aningaasartuuteqarsimaguit, taarsiissuteqarnermit aningaasartuutit taakku matussuserneqarsinnaapput.
Pilersuisumik annaasaqarnermut taartisiassat
Peqqinnissaqarfiup akisussaaffigisaanik katsorsartinnerup kingorna toqusumut, aappaaguit inooqataallutilluunniit, pilersuisumik annaasaqarnermut taarsiiffigitinnissamutpisinnaatitaaffeqarsinnaavutit. Aapparisaq inooqatigisarluunniit toqukkut qimaguttup inoqutigiinnut aningaassarsiassaagalui uani matussuserneqartarput.
Ajoqusernivit kingunerisaanik timikkut eqqarsartaatitigullu ilinnut peqqissutsimut kingunerisani annaasaqaatitut taaneqassapput.
Ataavartumik ajoquserneq
Ajoqutit aaqqinneqarsinnaanngitsut ilinnut taarsiissutigineqarsinnaapput. Ajoqusernitit qanoq ajortiginersut apeqqutaapput.
Timikkut imaluunniit eqqarsartaatitigut ajoqusernerit pineqarput.
Anniarneq
Ajoqusernermit kinguneqartumik ullut napparsimaffigisatit tamaasa taarsiissutigineqarnissaanik qinnuteqarsinnaavutit. Tamanna qasilisoornermut anniarnermullu ajunngitsorsiassanik taaneqartarput.
Malugiuk:
Napparsimaleriasaarsimaguilli taarsiiffigiteriaannaanngilatit. Taanna tunngaviusumik nappaammik taaneqartarpoq. Taanna nakorsiarninnut nakorsaatitorninnullu tunngaviuvoq.
Peqqinnissatigut katsorsartinninni aaqqiissuteqarnani ajornerulersitsisoqarsimappat taamaallaat taarsiisoqarsinnaavoq.
Taarsiissuteqartoqarnissaanik piumasaqaatinut tunngasut uani takusinnaavatit:
Taarsiissuteqartoqarsinnaaneranik uku assersuutaasinnaapput.
“Niut napivat peqqinnissaqarfimmullu ikiortissarsiorlutit. Nakorsiarputit niuillu napisimaneranut paasisaqannginnami angerlaqquaatit. Sivisuumik anniartarputit.
Napiffigisaa mamippoq, taamaattorli suliffinni timi aalatittariaqarakku suliunnaarputit.
Napineq paasineqarsimasinnaagaluarpoq suliarineqarlunilu taamaammat taarsiiffigitipputit. Suliamik kukkuluttortoqarmat sulisarnerit unitsittariaqarsimavat, eqqortumillu suliarineqarnissavit tungaanut aningaasarsiaqarsinnaanerit annaasaqaatigalugu. Aningaasarsiassaraluanut, qasilisoornermut anniarnermullu tunngasut taarsiissutigineqarsinnaapput.”
Taarsiissuteqartoqannginnissaanik aajuku assersuutigineqartut.
”Snescooterertillutit upipputit paffillu annersillugu. Ajoqusersimasut nakorsiartarfianni paffiit pillutsissimagit ilisimatinneqarputit. Angerlaraluaravit suli anniarputit, taamaammallu ajoqusersimasut nakorsiartarfinnut uterputit. Tassani qinnguartarneqarputit, paasineqarporlu paffiit napisimasoq. Qujanartumilli gipsilerneqaannassaatit. Paffillu pissusissamisut mamippoq.”
Assersuut taanna taarsiissuteqartoqassannginneranut assersuutaavoq, pissutigalugu kukkunermi ajoqutigeriikkamut, taarsiiffigineqarsinnaanermut piumasaqaammik kinguneqartumut ajornerulersitsinngimmat.
Taarsiissuteqartoqarnissaanik qinnuteqaatit ima nassiussinnaavat:
• MitID atorlugu nammineq kiffartuussivik iserfigiuk, ”Taarsiissuteqartoqarnissaanik qinnuteqaat nassiuguk” ataani sullissivik.gl-imi immersorsinnaavat nassiullugulu, imaluunniit
• Taarsiiffigineqarnissamut qinnuteqaammik immersueriarlutit, naammassigukku anillatseriarlugu e-mailikkut uunga nassiuguk nun@nanoq.gl imaluunniit allakkatigut Nunatta nakorsaaneqarfianut, postboks 120, 3900 Nuuk
Taarsiiffigineqarnissamut qinnuteqaatip nassiunneqarnissaanut ikiugassaaguit ikiorneqarsinnaavutit:
• Kommunimi innuttaasunut sullissivimmi (teknikkikkut) imaluunniit
• Nunatta nakorsaaneqarfianut attaveqarnikkut uunga nun@nanoq.gl imaluunniit oqarasuaat 34 51 92
Malugiuk:
Inuk alla sinnerlugu taarsiiffigineqarnissamut qinnuteqarniaruit, piginnaatitsissuteqassaatit.
Piginnaatitsissuteqarnissamut immersugassaq piginnaatitsissuteqartitsisussamit immersorneqassaaq, atsiukkamik e-mailikkut nassiunneqassaaq, uunga nun@nanoq.gl
Piginnaatitsissut – alla sinnerlugu naammagittaalliuuteqarniaruit qinnuteqarneq
Meeraq 18-it inorlugit ukioqarpat angajoqqaatut imaluunniit angajoqqaatut akisussaasutut taarsiiffigineqarnissamik qinnuteqarsinnaavutit.
Inersimasoq sinnerlugu taarsiiffigineqarnissamik qinnuteqarniaruit, taarsiiffigineqarnissamik qinnuteqaatip nassiunneqannginnerani Nunatta nakorsaaneqarfianut inuk pineqartup piginnaatinneqarnissannik ilisimatitsissaaq. Tamanna qanigisanut, soorlu angajoqqaanut, qitornamut inersimasumut imaluunniit aapparisamut aamma tuuppoq.
Pisinnaatitsissut pisariaqarpoq, pissutigalugu paasissutissat allanut tusarliuteqqusaanngitsut inunnullu ataasiakkaanut tunngasut, peqqinnissaqarfimmi suliamillu suliaqartunit taamaallaat ingerlanneqaqqusaammata.
Pisinnaatitsissut pillugu immersugassaq uani aaguk
Taarsiiffigitinnissamut noqqaassutit nassiutereerukku, paasissutissanik annertunerusunik suliamik ingerlatsinermi atugassanik nassiussinissannut periarfissaqarputit.
Qinnuteqaatit peqqissaartumik pitsaasumillu suliarineqaqqullugu, pisoqaqqammerneranit taarsiissuteqartoqarnissaanik qinnuteqapallannissaq pisariaqarpoq.
Pisumut taarsiissuteqartoqarnissaanik sivitsorsaallutit qinnuteqaruit, suliamut tunngatillugu inuit pineqartut eqqaamasaat killeqassapput allamiluunniit suliffeqalereersimallutilluunniit. Suliap aallartinnissaanut ajornakusuussaaq.
Inatsit malillugu taarsiissuteqartoqarnissaanik qinnuteqarnissaq kinguarsarneqarpallaassanngilaq. Taarsiissuteqartoqarnissaanik kissaateqannginninni kingusinaartoorsinnaanermut piffissamik killissaliussat eqqumaffigissavatit.
Ukiut pingasut
Paasineraniit ukiut pingasut qaangiutsinnagit – imaluunniit paasisimanissaraluaniit – ajoqusernermut taarsiissuteqartoqarnissaanik qinnuteqassaatit.
Ukiut 10
Suliaritinnernit ukiut qulit qaangiutereersimappata suliarineqarsinnaanera qaangiutereerpoq. Suliaritinninnit ajoqusersimanerit kingorna paasisimagaluarukkuluunniit.
Taarsiissuteqartoqarnissaanik qinnuteqaatit assigiinngitsunik marlunnik suliarineqartarput, ajoquserneq napparsimasumut qanga pisimanersoq apeqqutaasarluni. Ajoqusernernut 14. februar 2025 sioqqullugu pisimasunut, qinnuteqaat Peqqissutsimut Naalakkersuisoqarfimmit suliarineqassaaq, nalilerneqassaaq aamma aalajangiiffigineqassaaq.
Ajoqusernernut 14. februar 2025 pisunut imaluunniit taassuma kingorna pisunut suliap ingerlanera ataani nassuiarneqarpoq.
Taarsiissuteqartoqarnissaanut qinnuteqaativit suliarineqarnera:
1. Taarsiissuteqartoqarnissaanik qinnuteqaatit Nunatta nakorsaaneqarfianit tiguneqarpat uppernarsaammik nassiunneqassaatit.
2. Nunatta Nakorsaaneqarfianit suliaq aallaqqaasiutitut taarsiissuteqartoqarnissaanik suliatut suliarineqarnissaanut piumasaqaatit naammassinerai nalilerneqareerpat, suliaq qanoq ingerlanneqassanersoq paasissutissanik nassinneqassaatit.
Nunatsinni Nakorsaaneqarfiup katsorsartiffigisannit paasissutissat attuumassuteqartut katersussavai.
Nunatsinni Nakorsaaneqarfiup assersuutigalugu katsorsarneqarsimanivit qanoq ingerlasimanera aamma taarsiiffigineqarsinnaanermut pisinnaatitaaffiit nalilersorniarlugu nalunaarsuiffiit, tarrarsortinnerit, aaversinnermit misissukkat allallu atorneqartussat paasiniarsinnaavai. Paasissutissat peqqissaavinnit, utoqqaat angerlarsimaffianit imaluunniit paasiniarneqassapput
3. peqqinnissaqarfimmi sulisoq ilinnut katsorsaasimasoq. Paasissutissanik ilinneersunik amigaateqarpat Nunatsinni Nakorsaaneqarfiup attaveqarfigissavaatit.
4. Nunatsinni Nakorsaaneqarfiup taarsiiffigitinnissamut qinnuteqaatit pillugu paasissutissat attuumassuteqartut katersoreerpagit, allakkat Danmarkimi Patienterstatningenimut suliassanngorlugit nassiunneqassapput, tassani atugassat pissarsiarineqartut nalilissavaat, nakorsamit oqaaseqaatinik pissarsillutik, inatsisitigut nalilersuillutik, aamma naggataatigut suliami ilinnut tunngasumi aalajangiillutik.
5. Patienterstatningenip aalajangiineq Nunatsinni Nakorsaaneqarfimmut nassiutissavaa, tassanngaanniillu suliami illuatungeriinnut aalajangiineq, naammagittaalliutqarnissamut ilitsersuut ilanngullugu ingerlateqqinneqassaaq.
a. Suliami ilinnut tunngasumi piumasaqaatit naammassineqarpata, taarsiiffigineqarsinnaasumik ajoqusersimanerit akuerissavarput.
b. Suliami ilinnut tunngasumi piumasaqaatit naammassineqanngippata, aalajangiinermik taarsiiffigineqarsinnaannginnermut, sooq taarsiiffigitissinnaannginnernik nassuiaasumik pissarsissaatit. Aalajangiinermi naammagittaalliornissamut ilitsersuuteqassaaq.
Taarsiissuteqartoqarnissaanut qinnuteqaatinni atorneqartussat paasiniarneqareerpata, suliamut naliliisussamik attaveqaateqalissaatit.
1. Patienterstatingenimit aalajangiineq akuerinngikkukku Ankenævnet for Patienterstatningenimut qaammatip ataatsip ingerlanerani aalajangiineq pillugu naammagittaalliuteqarsinnaatitaavutit. Ajoqusernermi katsorsarfigineqarsimasoq taarsiissuteqartussaq aamma aalajangiinermik suliassanngortitseqqinnissamik periarfissaqarpoq. Suliassanngortitseqqinnissamut killiliussaq qaangiuppat taarsiissuteqarfigineqarnissamut naatsorsorneqarsimasut aatsaat tigusinnaavatit. Aalajangiineq suliassanngorteqqinneqarpat, aatsaat suliassanngortitseqqinneq naammassippat taarsiiffigineqarsinnaavutit..
2. Ankenævnet for Patienterstatningenimit aalajangiineq Nunatsinni Nakorsaaneqarfimmut nassiunneqassaaq, taassumalu suliami illuatungeriinnut, illit ilanngullugit nassiussiffigineqassaasi. Taarsiissuteqartussaasinnaasoq tamatuma kingorna taarsiissutissaq akilissavaa.
Taarsiiffigineqarnissamut pisinnaatitaaffeqaruit, taarsiissutissat annertussusissaat ilaatigut ajoqusernerpit qanoq annertutigineranik, ajoqusernerit ilinnut qanoq kinguneqartitsisimanersoq, ajoqusernerpit paasineqarnissaanut piffissaq qanoq sivisutigisumik aamma ukiunnit aalajangerneqassaaq. Sunniutaasussat amerlapput aammalu suliap naammassillugu suliarineqannginnerani aningaasat amerlassusaannik ilisimatitsisoqarsinnaanngilaq.