airplanebooksbriefcase business cogs cross election entertainment fish house law lockmedicalpeopleselfservices socialtax

Umiarsualivimmiinnermut aamma umiarsuarni takornarianik angallassisuni ilaasut akileraarutaat

Paasissutissat nalinginnaasut 

Ataani atuarneqarsinnaapput umiarsualivimmiinermut, takornarianik angallassisuni ilaasunut akileraarutit, aamma umiarsuarni takornariartaatini ilaasunut avatangiisinut iluarsaasinernullu akiliut.

Umiarsualivimmut akiliut 

Umiarsuit nunalinerminni umiarsualiviilluunniit avataanni kisarnerminni aamma Kalaallit Nunaanni kisarfimmut tikinnerminni umiarsualivimmiinnermut aamma umiarsuarni takornarianik angallassisuni ilaasut akileraarutinik Nunatta Karsianut akiliisassapput.

Umiarsualivimmi oqartussaaneq – umiarsualivik apeqqutaatillugu – RAL A/S-imit, SIKUKI Nuuk Harbour A/S-imit, KNI Pilersuisoq A/S-imit Mittarfeqarfiit A/S-imilluunniit isumagineqarpoq.

Piffimmi umiarsualivimmi oqartussaasup ullumikkutut umiarsuit akitsuummut akiliisussaatitaasut umiarsualivinnut tulliuttunut 19-inut talinneranni avataaniluunniit kisarneranni akiligassittarpai:

1) Qaanaaq,
2) Upernavik,
3) Uummannaq,
4) Qeqertarsuaq,
5) Ilulissat,
6) Qasigiannguit,
7) Aasiaat,
8) Kangaatsiaq,
9) Sisimiut,
10) Kangerlussuaq,
11) Maniitsoq,
12) Nuuk,
13) Paamiut,
14) Narsaq,
15) Narsarsuaq,
16) Qaqortoq,
17) Nanortalik,
18) Ammassalik og
19) Ittoqqortoormiit.

  • Umiarsuup bruttotonia 30.000 BT-nik qaangiisimassanngippat umiarsuit takornariartaatit ullup unnuallu aallartinnerinut ataasiakkaanut tamanut 1 kr. 10 øre. Umiarsuup BT-a 30.000- iuppat imaluunniit sinnersimassappagu akitsuut ullormut unnuamullu aallartittunut ataasiakkaanut tamanut tassaassaaq BT-kkaanut tamanut 2 kr. 20 øre.
  • Ilaasartaatit ullup unnuallu aallartinneranut 0 kr. 70 øre.
  • Aalisariutit Danmarkimi, Savalimmiuni nunaniluunniit allani angerlarsimaffeqartutut nalunaarsorneqarnikut ullup unnuallu aallartinneranut 0 kr. 70 øre.
  • Umiarsuit nassiussanik assartuutit umiarsuillu allat sapaatip akunnerata aallartinneranut 0 kr. 70 øre.

Sikuki Nuuk Harbourimi umiarsualivimmiinnermut akitsuut annikillisaq

Nuummi umiarsualivimmiinnermi aki umiarsualivimmut atuisunit akiliutip nunattalu karsianut akitsuutit ataatsimoortinnerannit akisuallaalernissaa nassuerutigineqarpoq, taamaammallu Nuummi umiarsualivimmut umiarsualivimmiinnermi akitsuummut ilaatigut appartitsisoqartassaaq.

Tamanna tunuliaqutaralugu umiarsuarnut takornariartaatinut 30.000 BT-mik annerusumik bruttotonseqanngitsunut Nuummi umiarsualivimmiinnermi ullup unnuallu aallartinneri tamaasa akitsuut 0 kr.-nut aalajangersarneqarpoq. Umiarsuarnut takornariartaatinut 30.000 BT sinnerlugulu bruttotonseqartunut akitsuut ullup unnuallu aallartinneri tamaasa maanna bruttotonsimut (BT) 1,10 kr.-nik akitsuutaasumit ullup unnuallu aallartinneri tamaasa BT-mut 0 kr. 70 øremut appartinneqassaaq.

Akitsuutip minnerpaaffissaa


Umiarsualivimmiinnermut akitsuummut minnerpaamik 70 bruttoton (BT) akileqquneqartassaaq.
Umiarsualivimmiinnermut akitsuutip minnerpaaffilernerata umiarsualivimmiinnermut akitsuummut minnerpaamik 70 bruttotonsinik (BT) umiarsuarnut angallatinullu akitsuuserneqartussaannginnissamut ilaanngitsunut tamanut umiarsualivimmiinnermut akitsuummik akiliisoqartarnissaa kinguneraa.

Umiarsuarnut takornariartaatinut akitsuut 

Ilaasunut akitsuut ilaasumut ataatsimut 50 kr.-nik annertussuseqarpoq.

Akitsuut umiarsualivimmut talinnerni tamani, umiarsualiviit avataani kisarnerni tamani kiisalu umiarsuit kisarneri tamaasa atuutissaaq.

Umiarsuarni takornariartaatini ilaasunut akitsuut ilaasut umiarsuarmiittut amerlassusai tunngavigalugit akiligassanngortinneqartassaaq.

Taamaalilluni umiarsuup takornariartaatip 500-nik ilaasoqarluni umiarsualiviit avataani kisarnerani talinnerani kisarneraniluunniit, akitsuummut akiligassaq ilaasut amerlassusai tunngavigalugit annertussusilerneqartassaaq, tassani ilaasut nunamut niusut amerlassusaat, umiarsualivimmulluunniit talinnermi kisarnermiluunniit niusut ilaasulluunniit allat ikisut amerlassusaat apeqqutaatinnagit.

Umiarsuarni takornariartaatini ilaasunut akitsuut umiarsualivissinnermut, umiarsualiviit avataani kisarnermut ataatsimut akiligassanngortinneqartassaaq. Kinguaattoornerit talittarfimmiluunniit taliffimmut allamut nuunnerit umiarsualivimmut tikeqqinnertut isigineqartassanngillat.

Umiarsuarni takornariartaatini ilaasunut akitsuut umiarsualivimmiinnermut akitsuummut atuuttumut taarsiissutaanngilaq tapiliussaallunili.

Umiarsuarni takornariartaatini ilaasunut avatangiisinut iluarsaassinernullu akiliut 


Umiarsuit takornariartaatit piffinnut kommunip toqqagaanut nunassinnerini ilaasumut ataatsimut 50 kr.-t angullugit kommunit akiliisitsisinnaapput. Kommunit umiarsualiviit 19-it siuliani taaneqartut, sinerissamili pinngortitamiluunniit piffiit kommunimiluunniit inoqarfiit allat aamma toqqarsinnaavaat.

Allaffissorneq pissutigalugu periuseq maannamut atorneqartoq ingerlatiinnarneqassaaq, taamaasilluni umiarsuarni takornariartaatini ilaasunut akitsuut, umiarsualivimmiinnermut akitsuut aamma avatangiisinut iluarsaassisarnermullu akiliut siuliani umiarsualiviit 19-iusut arlaannit ataatsimit aallarnermi najukkami umiarsualivinnut oqartussanut nalunaarutigineqarlutillu ataatsimut akiliutigineqartassaaq. Nunatsinni umiarsualivimmit kingullermit umiarsualivimmut tikinneq sioqqullugu nunamut niunerni tamani kommunimut akiliutinik naatsorsuinerit naatsorsuusiornerillu tamarmik ilaatinneqartassapput.


Akileraarut nunaligussinermi umiarsuup takornariartaatip ilaasui tunngavigalugit, nunaligunneqartut amerlassusai apeqqutaatinnagit, naatsorsorneqassaaq.


Avatangiisinut iluarsaassinermullu akitsuut 2024

Piffimmi umiarsualiveqarnermik oqartussaasumut nalunaaruteqarneq akiliinerlu 

Umiarsualivimmiinnermut umiarsuarnilu takornariartaatini ilaasunut nunatta karsianut akitsuut kommuninullu akiligassat ataatsimoortillugit regnearkimut (Excel) nalunaarutigineqartassapput.

Naatsorsuusiortarneq umiarsualivimmit kisarfimmilluunniit avalannerit kingorna aamma ataatsimut pisassaaq.

Umiarsuarni takornariartaatini ilaasunut akitsuutip, umiarsualivimmiinnermut akitsuutip kiisalu avatangiisinut iluarsaassisarnermullu akiliutip uku assigiinngissutigai:

  • Umiarsuarni takornariartaatini ilaasunut akiliut umiarsuarmi ilaasut ilaallutik tikittut amerlassusai naapertorlugit naatsorsorneqartassaaq (niunissat ikinissallu sioqqullugit),
  • Umiarsualivimmiinnermut akitsuut ullumikkut umiarsuup usisinnaassusia umiarsualivimmiinnerullu sivisussusaa naapertorlugit naatsorsorneqartareerpoq, aamma
  • avatangiisinut iluarsaanermullu akiliut piffissaq nunamut niunissaq sioqqullugu ilaasut umiarsuarmiittut naapertorlugit (ilaasut niusut qanoq amerlatiginerat apeqqutaatinnagu) naatsorsorneqartassaaq. Siuliani nunamut niunerit nammineerluni umiarsualivimmut tullermut tikiffimmi umiarsualivimmi oqartussaasumut nalunaarutigineqartassapput.

Akitsuutinut akiligassanullu ataatsimut akiliineq paasissutissat regnearkimi (Excel) nalunaarutigineqartut malillugit nammineerluni naatsorsorneqartassaaq.

Umiarsuarmi takornariartaammi ilaanermut akitsuut, umiarsualivimmiinnermi akitsuut kiisalu avatangiisinut iluarsaassinermullu akiliut siuliani taaneqareertutut qarasaasiakkut immersugassaq ataaseq atorlugu nalunaarutigineqartassaaq.

Akiliut nammineerluni nalunaaruteqartarnertut aaqqissuunneqassasoq siunnersuutigineqarpoq, tassani umiarsuup naalagaa, akunnermiliuttoq sullissisorluunniit paasissutissat eqqortuunerannik uppernarsaasassaaq. Paasissutissanik eqqunngitsunik nalunaaruteqarneq akiliisitsinermik kinguneqartassaaq.

Qarasaasiakkut immersugassaq umiarsuup suussusaanik angissusaanillu bruttotonsinngorlugu (BT) nalunaarutigineqartumik, ilaasut amerlassusaannik taakkulu nunamit suminngaanneernerannik, umiarsualivimmiinnermi ullup unnuallu aallartinnerani ilaasut amerlassusiviinik kiisalu kommunimut avatangiisinut iluarsaassisarnermullu akiliutip naatsorsorneqarnissaanut akilerneqarnissaanillu paasissutissaasinnaasut ilanngullugit immersorneqassaaq. Ilaasut nunamit suminngaanneernerannik immersugassiami ataatsimi nalunaarsuineq ingerlatiinnarneqassaaq.

Piffimmi umiarsualivimmi oqartussaasumut paasissutissat tunniunneqartut Naatsorsueqqissaartarfiup Kalaallit Nunaanni umiarsuarnik takornariartaatinik takornariartitsinerup ineriartorneranik (tassani umiarsuit takornariartaatit nuna aggerfiat aallaavigalugu agguarlugit amerlassusaat ilanngullugu) kiisalu nunatta karsianut akitsuutinik akiligassat naatsorsorneqarnerannut taamatullu kommuninut akiligassat akiligassanngortinneqarneri ilanngullugit qulaajaanermut atussavai.

Ataatsimut akitsuutinut akiliutinullu akiligassat paasissutissatut nalunaarutigineqartut regnearkimut (Excel) ivertinneqarnerat malillugu nammineq naatsorsorneqartassaaq. Kingorna immersugassaq qarasaasiakkut, soorlu Pdf-itut atsiornertalittut, umiarsualivimmi oqartussamut nassiunneqartassaaq.

Immersugassaq kingusinnerpaamik nunatsinni umiarsualivimmit il.il. aallarnermit piffimmi umiarsualivimmi oqartussamut nassiunneqartassaaq. Qarasaasiakkut immersukkamik umiarsualivimmut oqartussamut nassiussinermi umiarsuup naalagaata, akunnermiliuttup sullissisulluunniit akitsuutinut akiliutinullu akilerneqartussatut naatsorsukkat akuerisarpai.

Akitsuutit akiliutillu umiarsuup aallarnerata kingorna akiligassanngortarput, akiliinissamullu killigititaq ullut 14-iuvoq.

Umiarsualivimmiinnermut akitsuut pillugu allatut akileeriaatsimut Akileraartarnermut Aqutsisoqarfimmik isumaqatigiissuteqarnissamut periarfissaq umiarsuarnut umiarsualivimmut ataatsimut arlalinnulluunniit aalajangersimasumik angalasunut periarfissaassaaq. Taamaalilluni maanna allaffissornikkut pisariillisakkamik akiliisarnermik aaqqissuussineq umiarsuarnit aalajangersimasunik ingerlatiinnarneqarsinnaassaaq.

Umiarsualivinnili oqartussaasut umiarsuarnut aalajangersimasumik ingerlaarfeqartunut qaammammut umiarsualivimmiinnermut akitsuummut nalunaaruteqarnissamut akiliinissamullu ullorititaa, siuliani taaneqartunut assinguvoq, tassa qaammatip tulliani 15-ianni.


Umiarsuit takornariartaatit: Umiarsualivinnut, ilaasunut avatangiisinullu iluarsaassinermullu akitsuut

 

Umiarsualivimmi oqartussaanermik isumaginninneq 

Umiarsualiveqarnermut oqartussat qaammammi umiarsualivimmiinnermut aamma umiarsuarni takornarianik angallassisuni ilaasut akileraarutaannik akileeqqusissutinillu piffissaq eqqorlugu nalunaaruteqarfissaat akiliiffissaallu kingulleq tassaavoq qaammatip tulliuttup ulluisa 15-iat.

 

Akileraartarnermut Aqutsisoqarfik
Postboks 1605
3900 Nuuk

CVR-normu 19785386
Oqarasuaat: 34 65 10
E-mail: tax@nanoq.gl
Nittartagaq: www.aka.gl