Ilulissani Aalisartut Piniartullu Peqatigiiffiat unioqqutitsilluni qassusersorfiusumi misissuereerlutik akunnerminnilu oqaloqatigeereerlutik nalunaarutigaat unioqqutitsilluni qassusersorlutik qaleralinniarnerit tamarmik maanna unitsinneqarsimasut.
Aalisartut, peqatigiiffik kattuffillu immikkut suleqatigiipallannermikkut unioqqutitsinernik unitsitseqqusillunga innersuussinera malissinnaammassuk nersualaartariaqarput. Aalisartut taamaaliornermikkut takutippaat akunnerminni ataqqeqatigiissinnaanermik takutitsinermikkut akisussaassuseqarsinnaallutik.
Pingaartummillu ulluni makkunani nualluussuup coronap atuunnerani pingaaruteqarluinnarpoq inuiaqatigiinni ingerlaatsitta unittuunnginnissaat, taamaammallu nuannaarutigeqaara aalisartut akisussaassuseqarlutik iliuuseqarnermikkut unioqqutitsilluni qassusersornerup unitsinneqarneragut ajornerusumik kinguneqartinnagu aalisarsinnaanertik attatiinnarsinnaammassuk.
Palle Jerimiasssen, Avannaata Kommuniani borgmesteri