Borgmesteri Nitterilu periarfissarsioqatigiillutik oqaloqatigiittut

Ataatsimiinneq kommunip Ilulissani allaffeqarfissuani pisoq borgmesterip Palle Jerimiassenip aammalu Air Greenlandip pisortaanerata Jacob Nitter Sørensenip Angallanneq pillugu ukioq manna isumasioqatigiinnermi oqaloqatigiissutigisimasaannik nangitsineruvoq.

Oqaloqatigiinnerminni sorpassuarnik oqaloqatigiissuteqarput, soorlu Avannaata Kommuniani angalasunik assartugassanillu assartuineq aammalu timmisartunut iniliassatigut periarfissat, isumannaatsumik takornariartitsisalersinnaanissamut aqqutissarsiuussinissaq ilaatigut immikkuullarissunik takornariartitsisalernissamik periarfissartalik allarpassuillu eqqartorneqarput. Aqutsisulli taakku marluk isumaqarput ataqatigiissaakkanik suleqatigiissutissanik periarfissarsiorluni oqaloqatigiinnissaq nunatsinni pisariaqartinneqartoq.

- Ukiuni 60-ini Air Greenlandip ingerlasimanerani suliffeqarfik taannaasimavoq angalasut qanoq kiffartuunneqarnissaannik aalajangiisuusarsimasoq. Coronap atugaanerani matumani Air Greenlandip inissiffigisimasaa eqqarsaatigalugu suliffeqarfik atuisartut kissaataat malillugit siunissami kiffartuussisalissaaq. Periarfissat-uku taamaattut piffissami matumani allanngorfiusumi maani nunami suliffeqarfiit, Namminersorlutik Oqartussat, kommunit aammalu inuussutissarsiutilittut suliffiutillit qanimut oqaloqatigiissutigisariaqaraluaraat, Jacob Nitter Sørensen, Air Greenlandimi pisortaaneq oqarpoq.

Kommunip avannarpasinnerusortaa ineriartorfiunngitsoq
Pingaartumik coronap nalaani ilikkagaqarnerup tungaatigut suliffeqarfiit politikkikkullu aaqqissuussaaffiit inissisimaffigilersimasaminni tamakkiisumik naliliisinnaalerfianni misilittagaqarfigilikkaminnilu Kalaallit Nunaata iluaqutigisinnaasaanik eqqartueqatigiinnissaq pisariaqarsorineqarpoq.

Borgmesteri naliliivoq, naak takornariartitsisartut coronap nalaani kaaviiaartitamikkut annaasaqaraluaqisut ulluinnarsiutinik niuertarfiit kaaviiaartitaqarluarlutik ingerlalluartut ammalu Avannaata Kommunia kommune ukiut marluk matuma siorna pilersinneqarmalli aningaasaatinik uninngaasuutitigut aatsaat taama inissisimalluartigilersimasoq.

- Oqartarpunga, aalisarneq ingerlalluaraangat kommunip aningaasaqarniarnera aamma ingerlalluartarpoq. Kommunitsinni aalisartut aatsaat taama aningaasarsiorluartigilerput. Aalisartunut ukiumut 500 millioner koruunit akiliutigineqartarput, Ilulissanilu aningaaserivik taannaavoq naalagaaffeqatigiinnerup iluani aningaasanik tigusiffiunerpaasartoq. Aalisartut atueruloorput niuertarfiillu ingerlalluarnissaannut aningaasalersueqataallutik, Palle Jerimiassen Avannaata Kommuniani borgmesteri oqarpoq.



Borgmesterip ilutigalugu nassuerutigaa, aalisartut aningaasarsiorluarnerat pissutigalugu ineriartortitsinissamut periarfissaqaraluartoq inuiaqatigiinni pissutsit arlallit kommunip avannarpasinnerusortaani ineriartortitsinissamut akimmiffiusartut.

- Taamaammat-una inuiaqatigiinni ataqatigiissaakkamik suleqatigiinnissanik periarfissarsiorluni eqqartueqatigiinnissaq aatsaat taama pisariaqartigilersoq, Palle Jerimiassen oqarpoq.

Allattoq assiliisorlu: Káte Hansen, khan@avannaata.gl