airplanebooksbriefcase business cogs cross election entertainment fish house law lockmedicalpeopleselfservices socialtax

Tarnikkut ikiueqqaarneq Qaanaami pisariaqartinneqaqisoq

Avannaata Kommuniani suliniutilerinermi ataqatigiissaarisoq Markus E. Olsen kommunimi suliniummik allamik suliaqarnerminut atatillugu kommunip sulisuinik Qaanaamittunik tarnikkut ikiueqqaarnermik periarfissiisimavoq. Peqataasut ilaat Marie Kristiansen naliliivoq, ikiueqqaarnernik taamaattunik pisariaqartitsineq annertoqisoq.
22. juli 2020
Markus E. Olsen ilaatigut tarnikkut ikiueqqaariaatsinik Tankefeltterapimik aamma Emotionel frihedsteknikkimik katsorsaasinnaasutut ilinniarsimasoq kommunip sulisuinik ullut pingasut ingerlaneranni katsorsaasimavoq. Kommunip sulisui 35-t missaanniittut tarnikkut ikiueqqaarnermi peqataasimapput, taakkunanngalu sulisut aqutsisullu ilaat 15-it inuttut ataasiakkaatut aamma oqaloqatiginninnikkut ikiueqqaarnermik periarfissinneqarsimallutik.

- Misilittakkakka malillugit inuunermi sakkortuunik nalaattakkat pillugit qaqilerinissaq pisariaqartinneqartorujussuuvoq. Pisariaqartitsineq kommunimi assingusunik katsorsaaffigisimasanni tamani atuuppoq. Innuttaasutut peqqissutut inuuneqalerniarutta ajornartorsiutigut iternga tikillugu eqqartortariaqarpagut, Markus E. Olsen oqarpoq.

Ikiuniaraanni nukittusariaqarpoq

Eqimattakkaanut tarnikkut ikiueqqaarnermi ilaatigut sulisut suleqatitik kiinnerfigalugit iloqqasunngorlutillu issiallutik namminneq misigisimasaminnik oqaluttuarlutillu allat ajornartorsiutigisinnaasaannik tusarnaartarput. Peqataasut ataasiakkaat sunik eqqartuerusunnertik namminneq aalajangertarpaat. Inuttut ataasiakkaatut oqaloqatiginninnermi sulisut ataasiakkaat namminneq ajornartorsiutigisatik itisilerlugit eqqartuinissaminnut periarfissinneqarput. Peqataasut ilaat Marie Kristiansen peqataasimanini unnersiutigaa.

- Avinngarusimasumiilluni inulerisuullunilu taamatut oqaloqateqarnissamut periarfissinneqarsinnaaneq pisariaqaqaaq. Nammineq ataasiarlunga oqaloqatiginnereernerma kingorna ajornartorsiutinik eqqartuinissap qanoq pisariaqartigineranik takunnilerpunga. Oqiliallannangaarmat allaanngilaq ernumaneq isumaalunnerlu peertut, taamaakkaluartorli piffissaqarfigineqarluarluni oqaloqateqarnissaq suli pisariaqarsoraara. Oqaloqateqarnerit taamaattut inuttut ineriartornermut aqqutissiueqataasinnaammata sulisut akornanni pisariaqartinneqartorujussuupput. Sullitatsinnimmi ikorfartuilluarniarutta nammineq sullissisutut nukissaqarluartariaqarpugut, Marie Kristiansen, Qaanaami ilaqutariit illuanni ningiuusoq oqarpoq.

Tarnikkut ikiueqqaarnermik periaatsinik pikkorissarnerup saniatigut Tankefeltterapi aamma Emotionel frihedsteknik iluaalliuutinik, soorlu uippakajaarnermik, ernumarujussuarnermik, nalaassimasanik kingunerlutsitsinermik, aliasuuteqarnermik allarpassuarnillu qaangiiniarnermi katsorsaariaasiupput. Taamatut katsorsaanermi katsorsakkap misigisimasani eqqarsaatimigut misigissutsimigullu ukkatarisarpai ilutigalugulu timaani sianiuteqarfiit aalajangersimasut sallaatsunnguamik tagiartorneqartarlutik. Katsorsaariaaseq tamanna nunatsinni atugaajartuinnarpoq.

- Inuit namminneq kajumissutsiminnik sassartarput qamaniittuutiminnillu oqaluttualerlutik. Tamatuma takutippaa misigisimasanik sakkortuunik iperaaniarneq pisariaqartinneqartorujussuusoq, Markus E. Olsen oqarpoq.

Allattoq: Kรกte Hansen, khan@avannaata.gl