Jim Lyngvild saqqummersitassaalu pillugit nutaarsiassaq tutsiummalli Ilulissami innutaasut amerlasuut annertuumik qilanaarisimavaat iserlutik saqqummersitat takunissaat.
Aamma Avannaata kommunia oqallinnermut annertusisumut malinnaasimavoq, borgmester Palle Jeremiassen-nillu oqallinneq malinnaaffigisimavaa, ersersillugulu Jim Lyngvild-ip saqqummiinissaa tapersersorlugu.
-Saqqummersitsinissaq qilanaaraarput, nuannaarutigaarpullu Jim maanngarsinnaammat eqqumiitsulianilu saqqummersillugit. Eqqumiitsuliorneq killissanik qaangiisartoq tamattalu aalassatilluta oqallisigisinnaajuaannarparput, taamaattumik eqqumiitsuliorneq eqqumiitsuliortullu tapersersortuassavagut, taama oqaluttuarpoq borgmester, Palle Jeremiassen.
Saqqummersitsineq piorsarsimassutikkut illorsuarmi Sermermiuni ingerlanneqassaaq sapaat ulloq 13. marts.