August-imi kommunalbestyrelse-p ataatsimiinnerani aalajangiunneqarpoq katersuulluni ataatsimiinnissaq tulleq Qaanaami ingerlanneqassasoq.
Pissutsilli assingiinnitsut pissutaallutik ajoraluartumik ataatsimiinnissaq taamaatiinnarneqarpoq.
Tassa kommunalbestyrelse-mi ilaasortat arfineq-marluk katersuulluni ataatsimiinnissamut peqataasinnaanatik nalunaarsimammata.
Taassumalu saniatigut qulimiguutimmik angalaniarneq teknik-ikkut ajornartorsiuteqarfiulluni. Tamatumalu kingunerisaanik ilaasortat Uummannamiik, Upernavimmiik nunaqarfinniillu piffissaq eqqorlugu Ilulissanut tikissinnaannginnerat Qaanaamut ingerlaqqinnissamut.
Kommunalbestyrelse-p ataatsimiinnissaa pilersaarutit malillugit 7. oktober ingerlanneqassaaq, kisianni oqarasuaatikkut ataatsimiinnerussalluni. Qaanaaliarnissaraluamut taarsiullugu aalajangiunneqarpoq, parti-it aqutsisui borgmester-ilu kingusinnerusukkut ukiup naannginnerani imaluunniit upernaamut Qaanaaliassasut.