Avannaata Kommuniani takornariaqarnermut siunnersortit Suusaat Mathiassen aamma Asbjørn Bargsteen februar 2023-imi, Inuussutissarsiornermut Ingerlatsivik sinnerlugu, aallarnisassavaat misiligutigalugu suleqatigiinneq najukkami suliffeqarfiit akornanni, tassa unammillertitut suleqatigiinneq Cooperation in Competition. Taanna periuseq oktoberip naanerani Avannaata siunissaa qulequtaralugu inuussutissarsiorneq pillugu isumasioqatigiinnermi Ilulissani ingerlanneqartumi saqqummiunneqarpoq: link
Periuseq taanna naatsumik oqaluttuaralugu imaappoq, sammisami suliassaqarfiusumi ataatsimi suliaqartut arlariit suleqatigiillutik tamarmik imminnut iluaqusernerusinnaanerat kisimiillutik imminnut unammilleqatigiinnginnarnerminnut sanilliullugu. Tassa tapertareqatigiilluni suleqatigiinneq, suleqataasut tamarmik pissarsiffiginerusinnaasaat.
Avannaata siunissaa
Avannaata siunissaa pillugu inuussutissarsiorneq qulequtaralugu isumasioqatigiinnermi, ilaatigut inuussutissarsiutinik nutaanik aallarnisaasarneq pillugu ukkassiffiusumi, takornariaqarnermut siunnersortit saqqummiipput, Islandimi Letland-imilu isumasioqatigiinnerni ukioq manna siusinnerusukkut peqataaffigisimasaminni suleqatimik misilittagaannik aallaaveqarlutik.
Ilaatigut Islandimi Savalimmiunilu misilittakkat takutippaat suliffeqarfeeqqat nukittunerulersinnaasut kaaviiaartitaqarnerulersinnaasullu allanik suleqateqarnermikkut.
Nordplus-imi suleqatigiinneq
Cooperation i Competition Nordplus-imi suliniutaavoq. Nordplus tassaavoq Nordisk Ministerrådip ataani suleqatigiiffik paarlaasseqatigiiffiusorlu uku nunat akornanni attaveqaqatigiinneq nukittorsarumallugu: Kalaallit Nunaat, Danmark, Island, Savalimmiut, Norge, Sverige, Estland, Letland aamma Litauen.
Avannaata Kommuniani misiligutigalugu suliniut
Misiligutigalugu suliniutip 2023-imi ingerlanneqarnissaata siunertaraa, Avannaata Kommuniani suliffeqarfiit tallimat angullugit akunnerminni suleqatigiinnermik ineriartortitsinissaat, suleqatigiinnerlu tamanna aqqutigalugu suliffeqarfiutiminnik nukittorsaanissaat.
Taamaammat, Avannaata Kommuniani najugaqaruit, kissaatigalugulu suliffeqarfippit nukittorsaqqinnissaa, misiligutigalugulu suliniut imaattoq peqataaffigerusullugu? Taava Inuussutissarsiornermi Ingerlatsivimmi takornariaqanermut siunnersortit attavigisinnaavatit.