Borgmesteri Palle Jerimiassen (AI), Avannaata Kommunia
Ilulissat, Uummannaq Upernavillu apeqquserneqarsinnaanngitsumik sumiiffiupput Kalaallit Nunaanni sinerissap qanittuani aalisarnermi pingaaruteqarnerpaat, innuttaasullu inoqassutsimut naleqqiullugit aalisarnermikkut qaleralinnillu tunisisarnermikkut avammut niuernermit isertitanit tamakkiisunit isertitsiffiunerpaasartut.
Nalinginnaasumik tassaapput illoqarfiit nunaqarfiillu ingerlalluartut, innuttaasut arlalitsigut an-nertuunik isertitaqarlutik.
Tamannalu piffinni tamani ajornerulissanngitsoq inatsisissap qulakkeertariaqarpaa, massakkulli inatsissatut siunnersuut killormut innuttaasutsinnut kommunimullu sunniuteqartussaavoq.
Allannguinissaq taamatut isikkoqartillugu akuersaarneqarsinnaanngilaq.
Aalisartut sulisartullu aningaasarsiorluarlutik ingerlasut ajornerusumik atungaqalernissaat akuerinngilarput aamma akuersaarsinnaanngilarput.
Nunamut tulaassisussaatitaaneq allanngortinneqarpat Ilulissani raajaleriffik qanormita piniarpaat ??, massakkutummi pilersorneqarsinnaaunnaarpat angallatik raajarniutit namminneq avammut niiversinnaalerpata raajat tulaanneqartartut annikillerujussuarneqassapput taamaasilluni raajaleriffiup ingerlaannarnissaa qularnarsilluni.
Aasiaanngooq fabrikkiata matunnginnissaa aalisarnermut ataatsimiititaliap siulittaasuata eqqumaffigeqqungaa takuara kisianni Ilulissani raajaleriffik eqqaaneqanngilaq illersorneqarneranillu oqartoqarani, soormitaava?
Uummannami fabrikkit pingasut piujuaannartitsineq tungavigalugu aalisartoqalerpat tulaattakkat 40-%mik apparpata fabrikkit qassit matussappat?
Allamiut sulisut massakkut aalisartut tunisiuaannarnissaannut qulakkeerinnittuupput kommunimullu akileraartartuullutik, ulluinnarnilu sulinermi pinngitsoorneqarsinnaaunnaarnikuullutik.
Aalisarnermut inatsisissap inuiaqatigiinnut kingunerisinnaasai inatsisartut aalijangiinnginnerminni qulaajartariaqarpaat, sunaluunniimmi inatsissaq akuersissutigineqannginnerani tamanna ingerlanneqartussaavoq.
Inatsisissap tunngavigivaa piujuaannartitsinermut pisassat tamarmik tunngaveqalissasut.
Assersuut.
Massakkut aalisartoq ukiut tallimat kingulliit ukiut pitsaanerusut tunngavigalugit kvote-mik pissarsissooq. Taava imatut paasingaluarparput tassa kg-nik pissarsissasoq kisianni inatsisissaq atuaraanni taamaanngilaq.
Aalisartoq kg-mik pissarsinani procentimik pissarsissooq TAC-mit aallaaveqartumik.
Piujuaannartitsinermik aallaavilimmik aalisarneq ingerlanneqartussaammat TAC appartikkiaartuaarneqartussaavoq, taassumallu appariartornerata assinganik aalisagartassaminik kvotenik pissarsisimasup kvotia appariartassaaq.
Nerioqaanga inuiaqatigiinnut sunniutissai qulaajaqqaarlugit inatsisissaq ilusilersorneqarumaartoq, oqarluartaaginnarluni uppertitsiniaaneq atorsinnanngilluinnarpoq, inuiaqatigiit amerlasoorpassuit imminnut pilersortut susupalungalugit pilliutigalugit suliaqartoqarsinnaanngilaq.
Aalisarnermut inatsisissaq ullumi ingerlanneqalerpat neriuutingaara ernummaatigut paasillugit inuiaqatigiinnut kingunerisinnaasaannit qulaajaaqqunerput akuerineqarluni inatsissatut siunnersuut kinguartikkallarneqarluni naapiffiusinnaassasoq.