Issittumi peqqarniissinnaallunilu naatsorsoruminaassinnaasumi Avannaata Kommuniani qatserisartut sillimajuartarput piareersimajuartarlutillu, ajutoornernut ikiuukkiartornissaminnut. Upalungaarsimatitaanerminni pisinnaasatigut nukissaqarnikkullu pitsanngorsaajumallutik ilinniaqqinnerni peqataajuartarput. Taamaaliortariaqarput upalungaarsimatitaasutut suliassat takkuteriataartartut isumagisinnaajumallugit.
Ilinniartitaaneq taanna ilusilersugaavoq upalungaarsimasuutitat atuuttut nutaassallu pisinnaasatigut annertuumik kivitsiffiginissaat siunertaralugu. Avannaata Kommuniata, Jesper Stenbakken KOVIDA-meersup aamma Søren Korsgaard SK Care-meersup suleqatigiinnerisigut suliniut tamanna ingerlanneqarsinnaalerpoq. Søren aamma Jesper misilittangartuujupput pikkorissaasartunik atuartitsisarnerminni ukiorpassuarnilu Danmarkimi Nunatsinnilu upalungaarsimatitanik ilinniartitsisarsimapput, taamaalillutillu Kalaallit Nunaanni upalungaarsimasoqarnermi pissutsinik ilisimasaqarluarlutik.
Ilinniartitaaneq ingerlanneqarpoq piffissami 29. apriilimiit 8. maj 2024 ilanngullugu. Tamatumani siunertarineqarpoq Avannaata Kommuniani illoqarfinni tamani marlunnik pikkorissaasartoqalernissaa. Peqataasut atuartinneqarput siunertaralugu Upalungaarsimasunut Aqutsisoqarfiup najoqqutassiai naapertorlugit qatserisartunik pikkorissaasinnaalersinniarlugit.
Ilinniaqqinnermi sammineqarput inersimasunik pikkorissaanermi tunngaviusumik pisinnaasarineqartussat aamma moduli qaffasissutsimik qulakkeerinnittussaq, sinerissami pikkorissaasarnerni, qaffasissuseq suliamut tunngatillugu qulakkeerniarlugu. Tamatumani anguniarneqarpoq qatserisartut ajutoornermi taamaallaat pitsaasumik ikiuussinnaassanngitsut, aammattaarli pikkorissaasinnaallutillu imminnut tapersersoqatigiissinnaassasut, ataavartumik inuiaqatigiinnik isumannaallisaaniartuarnerminni.
Taamatut ilinniartitseqqiineq assersuutaavoq Avannaata Kommuniata upalungaarsinamerup nukittorsarnissaanik suliniuteqarneratut aammalu issittumi peqqarniitsumi avatangiisilimmi innuttaasut isumannaalllisaavigineqarnerannik qulakkeerinninniarnerata ilaatut. Qatserisartut pikkorissartinneqarnerisigut ilisimasaannillu annertusaanikkut kommunip upalungaarsimaneq nukittorsarpaa siunissamilu ajutoornernik pisoqarsinnaanera sillimmartaarfigalugu.
“Danmarkimi Kalaallit Nunaannilu upalungaarsimasuutitaqarnerit imminnut assigiissuterpassuaqarput” Jesper Stenbakken oqarpoq “Kisianni aamma assigiinngissuterpassuaqarput. Uagut suliassarisimavarput kalaallit suleqatigut suleqatigissallugit Upalungaarsimasuutitaqarnermi Aqutsisoqarfiup najoqqutassiaannik malinnissinnaaneq pillugu PEQATIGITILLUGULI aamma najoqqutassiat tamakku Kalaallit Nunaanni atorneqarsinnaaneri ukkatarisimallutigit.”
”Kalaallit Nunaanni Danmarkimilu upalungaarsimanerup tungaatigut aalajangiisunik assigiinngissuteqarpoq. Danmarkimi illoqarfimmit sanilerisamit ikiorserneqarnissarput qinnutigeriaannaasarparput, imaluunniit upalungaarsimasuutitat piffissap sivikitsuarannguup ingerlanerani tikiussinnaasarput. Assersuutigalugu tamanna takuarput Børsen-ip illorsuatoqarsuata ikuallannerani 24 tiimit siulliit ingerlaneranni qatserisartut politiillu biilitik ilanngullugit apuutereersimammata,” Jesper Stenbakken KOVIDA-meersoq oqaluttuarpoq nangillunilu:
”Kalaallit Nunaanni ajornarluinnarpoq upalungaarsimasuutitat taama amerlatigisut piffissap taama sivikitsigisup iluani tikiussinnaanerat, taamaattumillu kalaallit suleqatitta sungiusimavaat allatut aaqqiissuteqarniartarnertik; periarfissat taamaattut atorneqartartut ilaannikkut qallunaat najoqqutassiaannut qallunaat nunaanni pissutsinit aallaavilinnut ataqatigiissinniartarneri ajornarluinnarsinnaasarpoq.”
Qatserisartut namminneq suliumatussusertik pimoorussinertillu takutippaat ilinniarteqqinneqarnerminni. Aalajangiusimalluinnarpaat pisinnaasatik pitsanngoriartinneqartut atornissaat najukkaminni innuttaasunik isumannaallisaallutillu kiffartuussinissaminni.
Pissutsit danskit najoqqutassiaasa amerlasuutigut eqqarsaatigineq ajungaanni, issittumi avatangiisit atuuffianni, ajutoornerit qanoq iliorluni ikiorsiiffigineqarsinnaaneri immikkut ittunik iliuuseqarfiusariaqartartut isumagisinnaajumallugit, pisinnaasatigut naleqqussarnerullu tungaatigut unammilligassat ilinniaqqiffigineqartuartariaqarput, piumasaqaatit najoqqutassiallu allanngorartuartut naleqqussarfigiumallugit.