Ullortunermi nalliuttorsiorneq
Kalaallit Nunaanni inuiattut ullorsiorneq – Ullortuneq - nalliuttorsiutigineqarpoq
Ullortunermi – Kalaallit Inuiattut ullorsiorneranni, tallimanngornermi 21. juni 2024 ullaarnganiit innuttaasut qaaqqusallu nalliuttorsioqataanissaminnut piareersimapput.
Ukioq manna aamma sumiiffippassuarni innuttaasut ataatsimoorlutik nalliuttorsiornertik malunnartinniarpaat.
Ullaakkut ataatsimoorluni erinarsoqatigiinnerup, ullaakkorsioqatigiinnerup erfalasumillu amusinerup saniatigut, qinikkat innuttaasullu, utoqqaat inuusuttullu oqalungiarput.
Illoqarfinni arlalinni, ileqquliunneqartoq, puisimik angoqqaanniuttarneq ingerlanneqarpoq, puisimik angusimalluni tikiusseqqaartoq pinnattaassaqartinneqartarluni. Uummannami Qaavi Kruse puisimik tikiusseqqaartuuvoq, tulliulluni Apollo Skade.
Puisip neqaa agguaanneqarpoq, aamma ilaqutariit ikinngutigiillu pinngortitami igaasariakaapput imaluunniit katersortarfinni timersortarfinniluunniit assigiinngitsunik sammisaqaqatigiillutik.
Peqatigiiffiit, suliffeqarfiit inuillu ataasiakkaat arlalippassuit aliikkusersuipput ataatsimoortitsinermilu arlaatigut suleqataallutik, nipilersornikkut, uaaeernikkut, kalattoornikkut, qitinnikkut erinarsoqatigiinniluunniit peqataanermikkut.
Innuttaasut arlallit kajumissaaserneqarput assigiinngitsutigut malunnaatilimmik suliaqarsimanertik pillugu, assersuutigalugu kultoorikkut malunnaatilimmik suliniarsimanertik pillugu allatigulluunniit maligassiuisimanertik pillugu. Uummannami Nuka Nielsen Qimussermi ukiuni qulini suleqataasimanini qimussertarnerullu ataavartinneqarnissaani suliniuteqarnini pillugu kultoorikkut nersornaammik tunineqarpoq. Kultoorikkut kajumissaatit marluk tunniunneqarput, tassalu Heidinnguaq Jensen-imut aamma Hans Peter Sigurdsen-imut.
Inuiattut ullorsiornermut kommunalbestyrelsimi ilaasortat arlallit aamma peqataapput.
Borgmester Palle Jerimiassen (AI) kommuni sinnerlugu Ilulissani oqalungiartuuvoq, oqalungiaataalu uani nanisinnaavat
Kommunalbestyrelsimi ilaasortaq Knud Kleemann (A) Upernavimmi oqalungiartuuvoq, Uummannami oqalungiartuulluni kommunalbestyrelsimut ilaasortaq Elisabeth Nielsen (S).
…………………
Ullortunermi Kalaallit Nunaanni inuiattut ullorsiortarneq 1983-imi eqqunneqarpoq taamanikkut Namminersornerullutik Oqartussanit, ileqquliussassatut, taamaalillunilu inuiaqatigiit ilisarnaataasa ilaannut ilanngussimalluni, soorlu erfalasorput, kalaallisut assuutigut, inuiattut erinarsuuterput oqaatsigullu assigalugit.
Inuiattut ullorsiorneq pisarpoq Ullortunermi, tassa ukiup ulluisa tannersaanni, taamaalillunilu qaamanersaanni.
