Borgmesterip Palle Jerimiassen-ip (AI – attaviitsoq) pingasunngormat nunamut namminermut Naalakkersuisumut Jess Svane-mut pisortatigoortumik qinnuteqaat tunniuppaa, kommunimut qinigaaffik minnerpaamik ukiumik ataatsimik sivittoqqullugu.
Taamaaliornermut tunngaviuvoq kommunip aggulunneqarnissaanik kommunalbestyrelsip aalajangersimanera.
”Kommunalbestyrelsimit pisussaatinneqarpunga Namminersorlutik Oqartussanut qinnutigeqqullugu, kommunimut qinigaaffik minnerpaamik ukiumik ataatsimik sivittoqqullugu, kommunimik aggulunneqarnissaanut atatillugu piffissaq ikaarsaariarfiusussaq isumannaatsumik ingerlanissaa isumagineqarniassammat,” taama oqarpoq borgmester Palle Jerimiassen (AI – attaviitsoq).
Kommunalbestyrelsimit kissaatigineqarnerpaajuvoq piffissaq ukiunik marlunnik sivitsorneqassasoq, allannguutit piffissaqarluarluni torersumik isumagineqarniassammata.
Namminersorlutik Oqartussat qinnuteqaat akuerissappassuk, Avannaata Kommuniani 2025 pilersaarutaangaluartutut, kommunimut qinersisoqassanngilaq.
Qinigaaffiup sivitsorneqarnissaanik qinnuteqaat inuttaanut toqqaannartumik tunniunneqarpoq, Jess Svane Avannaata Kommunianut tikeraarmat.
Agguluinissaq pillugu nassuiaat piariingajalerpoq
Pilersaarutaanikuuvoq kukkunersiuisartut BDO, Avannaata Kommuniata kukkunersiuisorisai, juli 2024 nalunaarummik tunniussaqassasut, Avannaata Kommuniata aggulunneqarnissaata kingunerisinnaasaanik imaqartussamik.
Nalunaarusiaq illoqarfinnut tamanut siammarneqartussaavoq, imarisaa pillugu innuttaasut paasisaqarluarniassammata.
”Nalunaarusiami erserumaarpoq kommunip immikkoortortaqarfiisa aningaasaqarnerat, isertitat aningaasartuutillu qanoq isikkoqarnersut, aamma allaffissornikkut ingerlatsineq aningaasartuutillu qanoq isikkoqalerumaarnersut. Nalunaarusiaq tigoreeraluarparput, kisiannili Namminersorlutik Oqartussat paasissutissanik nalunaarusiami ilannguttariaqakkatsinnik paamaarussinerat pissutigalugu, nalunaarusiap naammassivinnissaa kinguarsarneqarpoq", Avannaata Kommuniani borgmesteri Palle Jerimiassen, attaviitsoq, nassuiaavoq.
Kommunalbestyrelsimi ilaasortap Anthon Frederiksenip (N) siunnersuuteqarnera tunngavigalugu kommunalbestyrelsi tunngaviusumik isummereernikuuvoq, kommunip aggulunneqarnissaa kissaatigineqartoq.
Kommunalbestyrelsimi ilaasortap Bendt B. Kristiansenip (IA) siunnersuuteqarnikuuvoq kommunip aggulunneqarnissaa pillugu innuttaasut taasisinneqassasut.
Kommunalbestyrelsimi isumaqatigiissutaavoq kommunip aggulunneqarnissaa pillugu siunnersuut innuttaasullu taasisinneqarnissaannik siunnersuut ataatsimoortillugit oqaluuserineqassasut; tamannalu pissaaq november 2024-imi.
Taamaattumik maannakkuungallartoq suli aalajangertoqarnikuunngilaq kommunip aggulunnissaa qanorpiaq isikkulerlugu piviusunngortinneqarumaarnersoq.
”Naatsorsuutingaara oqaluuserisassaq kommunalbestyrelsip immikkut ittumik ataatsimiinnerani oqaluuserineqarumaartoq, kisianni tassa kommunalbestyrelsi aalajangernikuuvoq, kommuni aggulunneqassasoq, suliassarlu naammassiniartariaqarpoq,” borgmesteri oqarpoq.
Kommunip aggulunneqarnissaa pillugu paasisitsiniaaneq
Avannaata Kommuniani kommunalbestyrelsi aalajangernikuuvoq kommunip aggulunneqarnissaa pillugu illoqarfinni paasisitsiniaasoqassasoq, tamannalu borgmesterimit isumagineqassasoq. Tamanna pereerpat kommunip aggulunneqarnissaa pillugu innuttaasunut taasisitsissutigineqassaaq, tamannalu pilersaarutaavoq november 2024-imi piumaartoq.
”Illoqarfinni paasisitsiniaasoqaraagat, nunaqarfinni siulersuisunut siulittaasut peqataasassapput, kingornalu namminneq nunaqarfimminni innuttaasunik ataatsimiisitsisassallutik. Taamatut periaaseqarnerup qulakkiissavaa, nalunaarusiap imarisaa pillugu inoqarfinni tamani ilisimannittoqalernissaa. Paasisitsiniaaneq ingerlanneqareerpat, alloriarnissaq tulleq piumaarpoq, tassalu innuttaasunik taasisitsineq,” taama kommunalbestyrelsip ataatsimiinnerani imaqarniliami allassimasoqarpoq."