Avannaata Kommuniani atuartut tamarmik ullumikkut Ipad-eqarput, taakkulu ullup atuarfiusup ingerlanerani atuartitsinermi aamma suliaqarnerminni atortarpaat. Ipads-it Kivitsisami pingaaruteqarluinnarput, kalaallit nunaanni kommunit ataatsimoorlutik meeqqat atuarfiisa ineriartortinneqarnerannut tunngatillugu.
Kivitsisamit aamma meeqqat atuarfianni aaqqiissutit digitaliusut ineriartortinneqarnissaat isiginiarneqarpoq, taamaasillutik atuarfinni mikisuni atuartut aamma ilinniartitsisumit ilinniarsimasumit tuluttut atuartinneqarsinnaaniassammata. Tamanna Ipadsit aamma atuartitsissutit digitaliusut aqqutigalugit pisarpoq, taakku ukiut kingulliit ineriartortinneqarput aamma maannakkut aningaasaateqarfiit sisamat ataatsimoorlutik 15 millionit koruuninik tapiissuteqarput, Kivitsisap nukittorsarnissaanut ineriartorteqqinneqarnissaanullu isumannaarinnittussaapput.
Aningaasaliissutit nutaat Avannaata Kommuniani atuartunut ilinniartitsisunullu pitsaasuupput.
”Maannakkut kalaallit nunaanni kommunit allat qanimut suleqatigineri nangeqqissinnaalerparput atuartut tamaasa soqutiginarnerusumik atuartilernissaat aamma pitsaanerusumik ilikkagaqarnissaat eqqarsaatigalugu” Avannaata Kommuniani Ineriartornermut Ingerlatsivimmi pisortaagallartoq, Anja Reimer oqarpoq.
Nunatta isorartussusaa inuttussusaalu ilinniartitaanermi aaqqiissutit digitaliusut atorlugit pitsaassutsimik kivitsinissamut periarfissaqarluarneranik isumaqarpoq. Kivitsisa tusagassiutinut nalunaarummini allappoq.
“Ukiut kingulliit arfinillit Kivitsisa suleqatigiillualernermut meeqqallu atuarfiisa pissanganartumik nutaamik sammiveqalernerinut sinaakkusiisuuvoq. Ataatsimoorussamik allaffeqarnermi nutaanillu aningaasaliiffigitinnikkut tunngavissinneqarluarpugut aaqqiinerit pilersitatta ineriartortiinnarnissaannut taakkulu aaqqissuussaanerup atuarfeqarnerullu iluaniitilernisaannut suliaqarsinnaalerluta. Ineriartortitsineq sivisusarpoq, nuannaarutigeqaarpullu aningaasaateqarfiit sisamaasut aallaqqaataaniillu suliniut tapersersorusummassuk tunngavissiilluaqataarusummatalu”, Kivitsisap siulersuisuini siulittaasoq, Malene Broberg oqapoq.
Tusagassiutinut nalunaarut tamakkiisoq uani atuaruk Kivitsisa tunngavissilluarneqarnerulernissaanut aningaasaateqarfimmit taperneqarpoq
Kivitsisa pillugu filmi nutaaq
Kivitsisap nittartagaani www.kivitsisa.gl filmeqarpoq 10 minutsit ingerlanerani Kivitsisap ukiut arfinillit kingulliit suliaasa pingaaruteqassusianik takutitsivoq. Filmi Inuk Silis Høegh-mit sananeqarpoq.
Kivitsisa:
⁃ Atuartunik peqataalersitsisut ilikkagaqariaatsit, alimasissumik atuartitsineq aamma piginnaanngorsaaqqiinissamut isikkussat nutaat
⁃ iPads-it atuartunut, ilinniartitsisunut aamma ilinniartitsisunngorniartunut tamanut
⁃ Kommunit ataatsimoorlutik allattoqarfii kommuninit tamanit ataatsimoorussamik aningaasalersorneqartut
⁃ Ilinniartitaanermut aqutsisoqarfik, Ilinniartitsinermik ilisimatusarfik, Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfik allarpassuillu qanimut suleqatigalugit
⁃ Tapiissutit katillugit 50 mio. kr.-nit Hempel Fonden, A.P. Møller Fonden, Villum Fonden aamma OAK Foundation Denmark-imeersut piffissami 2018 – 2023.
Kivitsisa tunngavissilluarneqarnerulernissaanut iliuusissaq 2024 – 2027:
⁃ Nuna tamakkerlugu atuartitsinermut siunnersortit allattoqarfinnut
⁃ Piginnaanngorsaaneq aamma ineriartortitsilluni suliniutit
⁃ Atuartitsissutit
⁃ 15 millioner koruunit aningaasaliissutit Hempel Fonden, A.P. Møller Fonden, Villum Fonden aamma Oak Foundation Denmark-imeersut