Asasakka innuttaaqatit
Ullumikkut ukiup ulluisa kingullersaanni, ukiumullu nutaarluinnarmut isinngilaarnitsinni, pisussaasutut misigisimavunga tamassinnut qamannga pisumik qutsavigissallusi.
Innuttaasut tamarluinnassi, ataatsimoornitsinnut arlaatigut suleqataasimasusi, kommunitsinnillu nuannersunngortitseqataasimasusi, tamassi qujanarujussuaq.
Inuussutissarsiorlutik ingerlatsisut pikkorissut ilissi aamma, atugassarititaasut naatsorsuutigiuminaaqisumik allanngorarfianni akillu qaffakkiartorfianni, ilaatigut unammillernartunit assoralisimaartitaasaraluarlusi suliffissaqartitseqataasimanissinnut aningaasaqarnitsinnillu siumukartitseqataanissinnut, qujanarujussuaq.
Minnerunngitsumik aalisartortagut ilungersorlutik ulappittuartut qutsavigaassi, kommunitsinni piffinni tamani pilersuisuunissinnut annertuumillu suliffissartitsisuunissinnut.
Kommunalbestyrelserput aamma tulluusimaarutissaavoq, aningaasaqarnermi pangallaffiuleraluartoq suleqatigiissutigalugu makiteqqissinnaasimammagu, maanna patajaatsumut inissillugu siunissamullu isigisumik aningaasaqarnikkut isumannanngitsumik periarfissaqalersilluta. Ilissiuvormi tapersersuilluarnissigut suleqatiginnikkumanermillu ilumoortumik ullumikkut nukittunerusumik inissisimalersimanitsinnut pisooqataalluinnartusi.
Ukiuni aggersuni unammilligassat periarfissallu pissanganarluinnartut siuneralaannguatsinniipput.
Mittarfissuartaassarput assut neriuuteqarfigaarput ineriartornissamut periarfissanik angisuunik nassataqarnissaa pillugu, tassalu siunissamut aningaasaliinissarput maannakkut isumagisariaqarparput.
Najugarisatsinni nunaqavissut takornariaqarnermik ingerlataqartu tapersersortariaqarpagut, taakkuupput maani aningaasaliinermikkut inerisaaqataasut.
Suliniutissat periarfissallu nutaat ammaffigisariaqarpagut, immaqa suliluunniit takusinnaanngikkaluakkagut.
Piffissami qaninnerpaami sulisussat amerlanerusut ingerlataqarfinnilu suliniutit amerlanerusut atorfissaqartippagut.
Periarfissat nutaat ataatsimoorluta ammaffigisariaqarpagut, takornariartitsineq kisiat eqqarsaatiginngikkaluarlugu, kisianni aamma inuussutissarsiutini allani aalisarnerullu iluani periarfissat nutaat eqqarsaatigalugit.
Nutaaliorneq ineriartornerlu tapersersortariaqarpagut, pissutsit allanngoriartornerannut naleqqussarluta periarfissallu ullumikkulluunniit ilisimanngikkaluakkagut siuninnguatsinniittut atorluarlugit.
Annertuunik suliassaqarpugut unammillernartunik, kisiannili aamma periarfissaqarpugut pissanganartunik, ataatsimoorluta suleqataanissatsinnik pisariaqartitsisunik.
Sunaluunniit suliaq tamatigut pitsanngorsarneqarsinnaasarpoq, meeqqanut tunngasut suliniutit malunnartumik pitsaanerusup tungaanut ingerlanerat nuannaarutigaara.
- Ilaqutariit avissaartuutsinnagit ilaqutariittulli ataatsimoorneq oqaloqatigiinnerlu atorlugu ingerlaqutariit ingerlariaqqinnissaannut nukittorsaanerit kommunitsinni annertusarlugit ingerlalernera sulilu nukittorsaaviginerat politikkikkut suliani pingaarnertut isigisarpara.
Taamaasiornikkummi ilaqutariit toqqissimasut angusinnaavagut meeqqallu angerlarsimaffiup avataanut inissinneqartartut minnerpaaffianissinnissaat aqqutissiuussinnaagatsigu.
Kommunitta takutereerpaa assoralisimaarnitsinni ataatsimoorfiusinnaalluni nukittusinnaallunilu.
Qaa, aamma suliassat unammillernartut periarfissallu nutaat pillugit takorluugaqallaqqissuusinnaanerput nutaaliorsinnaassuseqarnerpullu takutitsigu.
Partiit tamarmik anguniarpaat innuttaasut pitsaasumik atungaqartinneqarnissaat tamannalu aatsaat anguneqarsinnaavoq ataatsimoornikkut.
Tikkuartuulluni sulineq imminnut ungasillinermik kinguneqartarpoq, tusarnaarlunili inerisataqarnissamik siunnerfilimmik suleqatigiikkaanni sunaluunniit anguneqarsinnaavoq.
Siunissaq qaamanerusoq iluatsitsiffiunerusorlu pilersinniarlugu suleqatigiitta, ataatsimoorluta siumukarneq tamanullu atugarissaarneq pilersillugu, kommunerpullu najugaqarfigissallugu, suliffigissallugu ornissallugulu suli pitsaanerulersillugu.
Tamassi ukiortaami pilluaritsi, qujanarlu suleqataalluarnissinnut tapersersuinissinnullu.
Qujanarujussuaq.