Avannaata Kommuniata siunnerfilimmik suliniutigalugu qulakkeerusuppaa illoqarfimmi inuusuttunut ilinniagaqarnerup nalaani atugassarititaasut pitsaanerulersinnissaat. Anguniakkami tassani alloriarneq pingaarutilik tassaalerpoq, borgmesteri aalajangermat Munck-ip inissiaqarfiisa allaffiisalu pisiarinissaat pillugu siunnersuuteqarniarluni, Kommunalbestyrelsimi politikkikkut suliarineqarnissaa siunertaralugu.
Najukkami ilinniartitaanerit assut kissaatigineqarput
"Kissaatigaarput inuusuttatta Ilulissani ilinniagaqarsinnaanissaat - allamut ilinniariartorlutik aallanngikkaluarlutik. Taamaattumik ilinniartunut inissianik pilersitsinissaq pimoorullugu suliniutigaarput", taama oqarpoq borgmesteri Lars Erik Gabrielsen (S). "Munckip maannakkut sulisunut tammaarsimaarfiata tigunissaa periarfissatsialaavoq, pisariitsoq akisoorujussuunngitsorlu."
Munck-ip ataatsimoortumik neqeroorutaa
Munck ataatsimoortumik neqeroorummik nassiusseqqammerpoq, neqeroorummi ilaallutik inissiat 98-it, allaffiit, igaffiit nerisarfiillu. Munck-ip tammaarsimaarfia mittarfissuartaassap eqqaani nunaminertamiippoq, nunaminertarlu ilisaarukkiartuaartinneqartussaavoq sanaartornerup naammassiartuaarnera peqatigalugu.
Tamatumunnga kommunip Munck pitsaasumik atassuteqarfigisimavaa, inissiallu inniminnersimallugit, politikkikkut isummernissap tungaanut. Munck-ip nalunaarutigisimavaa, ataatsimut tunineqarnissaat, aammalu neriuutigalugu atortulersuutit tamakku illoqarfimmut innuttaasunullu iluaqutaanissaat.
Ilinniartitaanermut ineriartornermullu alloriarneq
Pisinissaq iluatsissappat, tamanna ilinniartunut inissiat misinnartumik amerleriarnerannik pilersitsissaaq, piffissami ungasippallaanngitsumi. Tamanna kommunip najukkami inuusuttunik tigumminniinnarnissamik ilinniagaqarnissaannillu periusissiaanut atatillugu alloriarnertut pingaarutilittut nalilerneqarpoq.
”Siunissamut aningaasaleerusuppugut - inuusuttortatsigullu tamanna aallartissaaq. Inissiat kisimik matumani pineqanngillat, kisiannili Iluliarmiunut kinguaariit tulliinut periarfissat sinnattullu pineqarput” borgmesteri ilassusiivoq.
Naatsorsuutigineqarpoq Kommunalbestyrelsi suliaq pillugu aggustip qiteqqunnerani isummerumaartoq.
