Ilaasortat Saqqamiit, Qeqertamiit, Oqaatsuniit aamma Ilimanaminngaaneersuupput.
Pikkorissaanermi suleriaaseq qanoq paasisariaanersoq, nunaqarfinni aqutsisut sunik periarfissaqarnersut aamma pisussaaffeqarnersut, kiisalu suliniutinut aalajangersimasunut aningaasaliissutinik qanoq pingaarnersiuissanersut soorlu nunaqarfinni aserfallatsaaliuinerit iluarsartuussinerillu pillugit saqqummiussoqarpoq.
-Nuannaarpunga pikkorissaaneq naammassimmat. Pissangasimavunga pikkorissaanissama qanoq tiguneqarnissaa pillugu, kisianni malugisinnaavara nunaqarfinni aqutsisut pissarsiaqarfigigaat. Ataatsimoornerput aamma oqaloqatigiinnissatsinnik periarfissiilluarpoq aamma peqataasut paasisimasaminnut qujamasupput, nunaqarfinnut siunnersortimut taartaasoq Andreas Wille oqarpoq.
John Rosbach (s) Ilimanameersoq aamma pikkorissaaneq nuannaraa.
Pikkorissaaneq pitsaasuuvoq, nunaqarfinnut siunnersortitta avitseqatiginissaa aamma attaveqarfigilluarnissaa pisariaqartittuaannarparput, taamaammat pikkorissaaneq naammagisimaarpara. Nangipporlu -Nunaqarfitta ineriartortinnissaanut peqataaffigerusupparput, aamma nuannaarutigaarput nunaqarfiit nunatsinnut aningaasartuutitut isigineqanngimmata. Kommunalbestyrelsit nutaat suleqatigilluarpagut tamannalu isumaqartorujussuuvoq John Rosbach (s) oqarpoq.
Pikkorissaanermi ullumi kingullermi allatsit ullup affaani peqataatinneqarput imaqarniliortarneq aamma suliamik saqqummiussisarneq sammineqarlutik. Kommunimi uppernarsaanerit siunissami assigiissarneqarlutik nassiunneqartarnissaat isumannaarniarneqarpoq.
Qaammatini tulliuttuni nunarfinnut siunnersortimut taartaasoq, Andreas Wille, Qaanaami, Upernavimmi aamma Uummannami pikkorissartitsisussaavoq.
