Hans Enoksen inuunermini Nunatsinni politikeriuvoq sunniuteqangaatsiartoq pingaaruteqartorlu.
Kalaaliunini tulluusimaarutigisuua, nunaqqatinilu tulluusimaarutigisuullugit. Inuunermini politikkikkut aallutaqarnini tamaat isorliunerusuni nunaqarfimmiut, pissakinnerusut minnerunngitsumillu aalisartut ulluinnarni inuunerisa oqinnerulernissaanut ilungersuuteqartuartoq.
Immikkut eqqaamajuassavara Royal Greenlandip kisermaassinera 2007-imi atorunnaarsimmagu. Tamatuma kingunerisaanik nammineq pigisamik aalisakkeriviit amerlanerusut pilersinneqarsinnaanngorput, ilaatigut Ilulissani Halibut Greenland pilersinneqarpoq.
Taamannak ammaassinikuuneq illoqarfitsinnut nunattalu immikkoortuanut sunniuteqangaatsiarpoq. Tamatumap kingunerisaanik aalisartorpassuit namminersorlutik inuussutissarsiuuteqalernissaminnut periarfissaqalernissaminnut aqqutissiuunneqarput aammalu ilaqutariinnut, nunaqqatigiinnut aningaasaqarnikkullu kinguneqarluartumik malitseqarpoq.
Qanittumi 4. klassimi atuartuniit pulaartoqarnikuuvunga.
Meeqqat inersimasunngorunik suna inuuniutigissallugu takorluugaqarineraat aperigakkit ima akipput: Aalisartunngorusuppugut.
Inuiaqatigiinni ulluinnarni inuunitsinni aalisartut qanoq pingaaruteqarluinnartumik inissisimanerat tamatuma ersersilluinnarpaa, taamatullu inissisimanitsinnut Hans Enoksenip qasuttuilluni aalisartut pillugit ilungersuuteqartuartarnerata kingunerisaanik, ullumikkut meerartatta aalisartut nuannaartoraat. Meeqqammi aalisarnerup inersimasunngorunik inuussutissarsiutaasinnaanera aamma takusinnaalerpaat.
Avannaata Kommuniani aalisarneq uatsinnut qitiulluinnarpoq.
Qitiulluinnarneranut Hans Enoksen qulakkeerinneqataallunilu ineriartortitseqataalluinnarpoq.
Toqukkut qimagunneratigut annertuumik annaasaqarpugut, aammali kingumut sarsuatitsinitsinni tulluusimaarutissaraarput annertooq.
Avannaata Kommunia Hans Enoksenip ilaqutaanut qanigisaanullu qamannga pisumik misiginneqataavoq.
Hans Enoksenip eqqaaneqarnera ataqqinartuuli.
Avannaata Kommuniani borgmesteri, Lars Erik Gabrielsen