Lars Erik Gabrielsen (S), Avannaata Kommuniani borgmesteri
Ilulissani mittarfissap sanaartorneqarfiani ikuallattoqalermat ersarissipallappoq upalungaarsimasut pisumik isumaginninnissaminnut naammattumik imissaqanngitsut. Qamisaaniarnermi illoqarfimmiit imertaatit atorneqartariaqarsimapput, pissutsilli tamakku siusinnerusukkulli naammaginanngitsutut ulorianaateqangaatsiartutullu oqaatiginiarneqartarsimapput.
Ikuallattoqarnera taamaammat sanaartorfimmi taamaallaat pisutut isigineqassanngilaq, kisianni mittarfissap nutaap ataqatigiissarneqarnermigut upalungaarsimaffigineqarsinnaanera ajornartorsiutaavoq ersarissoq pimoorunneqartariaqartorlu. Kommune arlaleriarluni mittarfissap eqqaaniittut imeqarfiit annikippallaarnerarlugit oqariartortarsimagaluarpoq maannakkullu ernummat tamanna tunngavissaqarluarsimasoq uppernarsineqarpoq.
Ikuallattoqarnerata nalaani upalungaarsimasut avataaniit imermik pilersorneqartigatik containerini illulianik qamisaasinnaasimanngillat. Imeq pigineqartoq nungummat qatserisartut erngup illoqarfimmiit imertaatit atorlugit assartorneqarnerani utaqqisariaqartarsimapput qamisaaneq nangeqqinniarlugu. Tamannalu qamisaanerup unitsinneqaqattaarneranik aamma ulorianartup pisariaqanngitsumik annertunerulerneranik nassataqarpoq.
Upalungaarsimasut ikuallattoqartillugu imissaarunnerat imermillu pilersorneqaqqinnissaminnut utaqqisariaqalernerat erngup pigineqareersup naammannginneranik ersersitsivoq. Akuerineqarsinnaanngilaq – ingammik ajornartorsiut oqartussanit akisussaasuniit oqariartuutigineqareernikuusoq eqqarsaatigissagaanni.
Pisumi uani iluatsitsivugut. Ikuallattoqarnera ajunaarnersuarmik kinguneqanngilaq. Kisianni pisoq tamanna ilimasaarinertut pimoorunneqartariaqartutut isigineqartariaqarpoq. Ilulissani mittarfissaq nutaaq containeriniit illulianik annertunerusunik peqartussaavoq. Timmisartut, ikummatissaasivik, tikikkiartortarfik/aallariartortarfik inuppassuillu upalungaarsimasunik nukittunerusunik ingerlalluarnerusunillu peqarnissaat pillugu qaffasinnerusunik piumasaqaatitaqartussaapput.
Taamaammat tunngaviusumik piumasaqaataavoq mittarfittaassap nutaap upalungaarsimasussaasalu killiligaanngitsumik imermik pilersorneqarnissaat. Mittarfik nutaarsuaq utaqqiisaasumik aaqqiissuteqarfiusussaanngilaq, ikuallattoqartillugu illoqarfimmiit imermik pilersuisoqartussaanera pisariaqartussaanngilaq.
Ullumikkut illoqarfimmiit mittarfimmut aqqusineq imermik assartuiffiusinnaasoq ataasiinaavoq. Ikuallattoqarneranilu ersarissivoq qanoq tamanna sanngiissutaatiginersoq. Aqqusinermi ajutoortoqaraluarpat aqqutissarlu asserneqaraluarpat qamisaanerit naammassineqarsinnaassanngikkaluarput. Mittarfimmullu aqquserngup ataasiinaanera aamma illersorneqarsinnaanngilaq. Ajornartorsiulli tamanna kommunimiit Namminersorlutik Oqartussanut arlaleriarluni apuunneqartaraluarpoq. Aaqqinneqartariaqarpoq, ingammik isumannaallisaanikkut mittarfissap nutaap ammarneqarneranut atatillugu isumannaallisaanikkut tatisimaneqarnerup annertunerulernissaa eqqarsaatigalugu.
Upalungaarsimanermi qullerpaami oqartussaassuseqartutut iliuuseqartoqarnissaa piumasaraara – aamma tamanna piaartumik mittarfissallu atulinnginnerani pinissaa piumasaralugu. Taamannak isumaqarnera Avannaata Kommuniani upalungaarsimasut pisortaanit isumaqatigineqarpoq. Mittarfimmik nutaamik ammaanissaq akuersaarneqarsinnaanngilaq illersorneqarsinnaananilu ikuallattoqartillugu sunniuteqarluartumik ataavartumillu qamisaasoqarnissaanik isumannaarinninnissaq pisinnaanngippat.
Isumannaatsuutitsineq iluatsitsinermit aallaaveqartussaanngilaq. Mittarfissap sanaartorneqarfiani ikuallattoqarnerata maannamut ersarissumik takutereerpaa upalungaarsimasut taamannak inissisimatillutik naammaginanngitsut. Akisussaaffik ersarippoq, mianersoqqusinerit oqaatigineqareerput – maannakkulli iliuuseqartoqartariaqalerpoq.