1. Suliakkiussisoq

Suliakkiussisoq:                           Avannaata kommunia

Najugaq:                                        Noah Mølgårdip aqq. 9, 3952 Ilulissat

Attaveqarfissaq:                           Hans Inûsugtok’

E-mail:                                            hain@avannaata.gl

Neqeroorut tiguneqarsimassaaq kingusinnerpaamik 30.01.2026 neqerooruteqarnissamullu piffissarititaasup kingorna ulluni 30-ni pituttuisuussalluni.

2. Suliariumannittussarsiuussinerup suussusia

Suliassaq tamanut ammasumik suliariumannittussarsiuunneqarpoq, soqutiginnittut tamarmik neqeroorusiorsinnaatillugit.

Suliariumannittussarsiuussineq pisortat oqartussaaffigisaanni suliffeqarfiinilu nioqqutissanik kiffartuussinernillu pisiniarnermut tunngatillugu neqerooruteqartitsisarneq pillugu Inatsisartut inatsisaat nr. 6, 12. juuni 2019-imeersoq naapertorlugu ingerlanneqarpoq.

3. Siunertaq

Siunertarineqarpoq flis-inik aamma/blok-inilluunniit Kalaallit Nunaanni tunisassianik pisinissaq Kalaallit Nunaanni nunaqarfinni aqqusinernut atorneqarsinnaasunik. Atortussiat issittumi avatangiisinut naleqquttuussapput, sivisuumik piusinnaallutik annikitsuinnarmillu aserfallatsaaliugassaassallutik. Peqatigitillugulu neqeroorusiornermi kalaallit inuussutissarsiortut najukkamilu suliffissaqartitsinissaq tapersersorneqassallutik.

4. Suliassap annertussusia

Suliassamut ilaavoq flis-inik/blok-inik aqqusinernut mikinernut, pisuinnaat aqqutaannut aamma nunaqarfinni angallaffiusuni atortussanik sanaartorneq pilersuinerlu. Aningaasartuutissanut sinaakkutissat tamarmiusut annerpaamik kr. 1.500.000-iussasut aalajangerneqarpoq.
​

5. Atortussat pillugit piumasaqaatit

Atortussiat sananeqaateqassapput naleqquttutullu uppernarsagaassallutik issittumi avatangiisini atorneqarsinnaasutut. Qerinartumut-/mannguttarnermullu ukiup ingerlanerani nikerarnermut akiuussinnaassusseqassapput mattussutsimikkut, atuuffimmikkut piffissamiluunniit qanoq sivisutigisumik atuussinnaanermikkut tamanna annikillissutiginagu aammalu issittumi naammattumik nukittussuseqartariaqarput sakkortuumik eqqorneqartarnermut nungullariartornermullu akiuussinnaassuseqassallutik.

Atortussiat aammalu sananeqaataat tamarmiusoq ima ilusiligaassapput, assakaasulinnik oqimaatsunik nassataqarsinnaasunut uninngaffigineqarsinnaallutillu ingerlaarfigineqarsinnaassallutik. Sananeqaatsimikkut naatsorsuutigineqarsinnaassapput assakaasut aksel-illu naqitsineri annertuut, aammalu oqimaatsunik usisunit sangujoraarfiusinnaassallutik, uneriataarnermut sangunermilu innarlerneqaratik, quppanitsiteratik inissisimanerat nikinnani imaluunniit atorsinnaassutsimikkut annaasaqaratik. Naqitsinernik annertuunik uteqattaartunik atorsinnaassusiat naliliivigineqarsimassaaq.

Tamatuma saniatigut atortussiat isugutammut, sermimut, apummut tamakkulu aattorlutik erngup kuunneranut, kiisalu imermut sitseruffigiuminaallutillu qerinartorujussuarmut akiuussinnaassuseqassapput. Qaavi naammattumik quaaffigiuminaallisagaassapput, apummit sermimillu qallersimatillutik, aammalu soorlu aputaajaanermi, ilaatigut nivaattamut, qalutaatinut taamaaqataanulluunniit atuiffiunerminnut akiuussinnaassuseqassallutik.

6. Suliassaq annertussuserlu pillugit naatsorsuutit

Neqeroorusiortup neqeroorummini nassuiassavaa, aningaasat sinaakkusiunneqartut atorlugit flis-it/blok-it qassit sananeqarlutillu tunniunneqarsinnaanersut. Aamma neqeroorusiortup nalunaarsimassavaa, flis-it/blok-it neqeroorutigineqartut atorlugit nunaqarfimmi aqqusineq qanoq takitigisoq pilersinneqarsinnaanersoq. Naatsorsuinermi tunngavigineqassaaq, nunaqarfinni aqqusernit nalinginnaasumik 2,5-3,0 meterisut silissuseqakkajunnerat.

7. Neqerooruteqartumut piumasaqaatit

Neqeroorusiortup, suliffeqarfiup Kalaallit Nunaannut attuumassuteqarnera, atortussiat Kalaallit Nunaanni atortussianik atuilluni sananeqaataannik misilittagaqarnera aamma issittumi sanaartorneq kiisalu najukkami sulisussanik atuineq misilittagaqarfiginerlugu nassuiassavaa.

8. Tunniussinermi piumasaqaatit

Suliassamik tunniussineq pissaaq ataatsimut oqimaassutsit ataani taaneqartut tunngavigalugit naliliisoqarneratigut:

• Kalaallit Nunaanneersunik misilittagaqarneq50 %
• Najukkami sulisunik atuineq25 %
• Kalaallit suliffeqarfiutaat10 %
• Sinaakkutissami aalajangerneqarsimasup iluani

tunniunneqarsinnaasut annertussusiat                                                   15 % 

9. Nalilersuineq tunniussinerlu

Neqeroorutitsinerup naammassineqarnerani neqeroorutit tiguneqarsimasut nalilersorneqassapput, suliassarlu neqeroortumut, ataatsimut isigalugu, piumasaqaatinik pitsaanerpaamik neqerooruteqarsimasumut tunniunneqassaaq.

10. Neqerooruteqarneq

Neqeroorut tiguneqarsimassaaq kingusinnerpaamik 30.01.2026 neqerooruteqarnissamullu piffissarititaasup kingorna ulluni 30-ni pituttuisuussalluni.

11. Apeqqutit

Suliariumannittussarsiuussineq pillugu apeqqutit allaganngorlugit suliakkiussisumut nassiunneqassapput, kingusinnerpaamik 19.01.2026, nal. 10.00.