- Periarfissat pitsaanerusumik agguataarneqassapput
Kommunit aningaasaqarnerat innuttaasullu qanoq katitigaanerat pillugu § 37 naapertorlugu apeqquteqaammut akissuteqaammi kingullermi Nunatsinni kommunit akornanni annertuumik assigiinngittoqarnera uppernarsarneqarpoq. Ineriartorneq annerpaamik Nuummi eqiterussimavoq, kommuninili isorliunerusuniittuni, soorlu Avannaata Kommuniani, ilinniagaqarnissamut, suliffeqarnissamut najukkamilu ineriartortitsinissamut periarfissat annikinnerunerat misigineqarpoq.
Taamaattumik Nunatsinni kommunit avannarlersaanni borgmesterip, Lars Erik Gabrielsenip, ilaatigut Qeqqata Kommuniani borgmesterip, Malik Berthelsenip, isornartorsiuinera, tapersersorpaa.
”Inuuneq pitsaasoq atorlugu inuusoqarsinnaavoq, Nunarpullu tamakkerlugu inuunerissaartoqarsinnaasariaqarpoq. Taamaattoqassappalli, ilinniartitaanermut, suliffeqarnissamut ineriartornissamullu periarfissat nunami sumiiffimmut ataasiinnarmut eqiterunneqarsinnaanngillat,” Lars Erik Gabrielsen oqarpoq.
Avannaata Kommuniani illoqarfiit sisamaapput nunaqarfiillu 21-ullutik. Tamaani innuttaasut illoqarfiit pingaarnersaannit ungaseqisumi inuunertik atorpaat, nukittuumik ataatsimoorfeqarlutik najukkaminnullu sorlaqarfeqarlutik. Ukiut ingerlaneranni atuarfinnut nutaalianut, ulluunerani paaqqinnittarfinnut, attaveqaasersuutinut pitsaanerusunut inuussutissarsiornermilu ineriartortitsinermut aningaasalersuisoqarsimavoq. Inuusuttulli ilaqutariillu meerartallit kommunimi najugaqaannarnissaannik kajumissaarniarnerat ajornakusoorpoq.
”Sapinngisarput tamakkerlugu, meeqqat inuusuttullu meeqqat atuarfiata kingorna inuunermi ingerlaqqinnissaannut pitsaanerpaamik tunngavissinnissaat qulakkeerniarlugu suliniarpugut. Kommunimi tamanna pisussaaffigaarput. Inuusuttuniillu tusartarparput, ilaquttaminnut najukkamilu inuiaqatigiit pitsaasumik inooqatigiinnerannut qanittumiiginnarusuttartut. Tamannali timitalimmik toqqaannarsinnaaneq ajorpaat, ilinniarfissat suliffissallu tulluartut taamaallaat Nuummiimmata. Tamannalu assut uggornarpoq,” Lars Erik Gabrielsen oqarpoq.
Eqiterineq naalakkersuinikkut toqqagaavoq
§ 37 naapertorlugu apeqquteqaammut akissutip takutippaa, Kommuneqarfik Sermersooq kommuninut allanut sanilliullugu, isertitaqarnerujussuusoq aammalu sulisinnaasutut ukiulinnik amerlanerujussuarnik innuttaqartoq. Lars Erik Gabrielsenip naliliinera naapertorlugu tamanna pisortat suliffeqarfiutaasa suliffeqarfiillu allat nuna tamakkerlugu atuuffeqartut sumi inissisimanerannik attuumassuteqarluinnarpoq.
”Eqiterineq naalakkersuinikkut toqqagaavoq. Sapiissuseqartariaqarpugut allaanerusumik pingaarnersiuinissatsinnut, taamaaliornikkullu nuna tamakkerluni imminut pitsaasumik ataqatigiilersinneqarsinnaammat”, Avannaata Kommuniani borgmesteri oqarpoq.
Isumaqarluinnarpoq suliffeqarfiit anginerit Nuup avataanut aamma inissinneqarsinnaappata tamanna pitsaasumik kinguneqarsinnaasoq, taamaattumillu Naalakkersuisut kajumissaarpai kommuninut naligiissaarisarneq pillugu aaqqissuussineq, ukiuni arlalinni nikisinneqarsimanngitsoq suliffeqarfinnillu nuussuineq pillugu piaarnerpaamik nalilersuinissaannik.
Nuna imminut ataqatigiittariaqarpoq
Lars Erik Gabrielsenip erseqqissarpaa, oqallinnermi matumani kommunit imminnut aporaatsinneqarnissaat pineqanngimmat.
”Nuup sanngiinnerulersinneqarnissaa pineqanngilaq. Pineqarpoq, nunatta pitsaanerusumik imminut ataqatigiinnissaa, Naalakkersuisullu Nunarput tamakkerlugu akisussaaffeqarput – aamma kommunit isorartoqisumik sineriallit, nunaqarfippassuallillu, ilanngullugit”, oqarpoq.
Borgmesterip, ineriartorneq ullumikkutut ingerlaannassappat, ajortorujussuarmik kinguneqarnissaa annilaanngassutigaa.
”Inuusuttut siunissaminnik toqqaanialernernerminni nunatta ilarujussua kajumigiuaaratarsinnaavaat. Ineriartorneq taamaattoq maannakkut unitsittariaqarparput,” Lars Erik Gabrielsen oqarpoq.
Naalakkersuisut kajumissaarpai politikkikkut suliassat aggersut atorlugit, ilaatigut kommunini aaqqissuusseqqinneq naligiissaarutillu ilanngullugit, ineriartornissamut periarfissanik oqimaaqatigiissaarineq pilerseqqullugu. Malik Berthelsenip akileraartarnikkut aaqqissuussinikkut periarfissat assigiinngitsut misissorneqarnissaannik siunnersuutaa aamma tapersersorpaa, Nuup avataani illoqarfinni allani nunaqarfinnilu najugaqarnissap kajuminnarnerulersinnissaanut aqqutaasinnaammat.
”Inuuneq pitsaasoq Nunarput tamakkerlugu siumugassaavoq. Tamanna aamma naalakkersuinikkut toqqakkatta ersersittariaqarpaat,” borgmesteri oqarpoq.