Februaarip aallaqqataani 2026 Karsten Høy ingerlatseqatigiiffimmi Visit Ilulissani pisortatut atorfinippoq. Nunatsinni inuussutissarsiornermi aqutsinermik ineriartortitsinermillu ukiut 25-it sinnerlugit misilittagaqarpoq, kiisalu illoqarfimmut meeraanerminiilli inuttut attuumassuteqarluni.
“Ilulissat nunarsuarmi immikkuullarissutut tusaamaneqartorujussuuvoq, takornariafissatut periarfissagissaarluni tamaanilu suliffissanik ataavartunik pilersitsinissamut periarfissaqarluarpoq, aamma inuusuttunut,” Karsten Høy, Visit Ilulissani pisortaq oqarpoq.
Pisortaq nutaaq isumaqarpoq Ilulissat ateq nunarsuarmi tusarneqarluartareersoq. Kommunip pigisaanik Visit Ilulissat pilersinneqarmat kommuni maanna takornariaqarnerup ineriartortinneqarnera ataatsimoortinniarlugu, nukittorsarniarlugu aqulluarniarlugulu alloriarpoq.
Angerlarsimaffik akisussaaffillu
Karsten Høy Ilulissani peroriartorsimavoq aamma illoqarfimmi atuarfimmi atuarsimavoq. Meeraanermini qaqqani pinnguaqatigisimasai ullumikkut nunap immikkoortuani inuussutissarsiornermi pingaaruteqartunut ilaapput.
”Angerlartutut misigisimanarpoq. Tamannalu pissutigalugu uannut pingaaruteqarluinnarpoq, ineriartortitseqqinnissami najugarisap aallaaviginissaa. Naleqarnerulersitsinermi najukkami ingerlataqaqataanertik akuersaarnartumik pissarsiaqaatigisariaqarpaat,” erseqqissaavoq.
Taamatut periuseqarnissaq Karsten Høymut nutaajunngilaq. Ukiuni 15-ini Nalik Ventures-imi pisortaanertut aqutsisuuvoq, tassanilu Kalaallit Nunaanni aallartisaasut avatangiisaannik ineriartortitseqataallunilu pitsaassusilinnik aaqqissuusseqataavoq. Kingusinnerusukkut inuussutissarsiornermi suliniuterpassuarni annertuunik aammalu pisariusuni suliaqarsimavoq, ilaatigut Greenland Ruby-mi pisortatut, kiisalu suliffeqarfinni pingaarutilinni siulersuisuni ilaasortaasimalluni – ilaatigut Royal Greenland-imi siulersuisuni ilaasortatut.
”Nunatsinni inuussutissarsiutinik ineriartortitsiniaraanni naammagittartuusariaqarpoq, oqaloqatiginnittuusariaqarluni akimullu suleqatiginnissinnaasariaqarluni. Tamanna uanga qiteralimmioraara”, oqarpoq.
Takornariartitsineq iluaniit takullugu
Takornariaqarneq Karsten Høymut periusissiornerinnaanngilaq aaqqissuussaanerinnaananilu. Namminerli misilittagaqarnermik aamma tunngaveqarpoq. Inuusuttuaraallunili takornarianik angallassisartuusimavoq, tikeraanik imaani angallassisartuusimalluni, mittarfimmi takornarianik tikilluaqqusisarluni taamanikkullu Hotel Arctic ammaqqammersoq saaffiginnittarfimmi sulisuusimalluni – amerlasuutigut ullormut akunnerni 16-20-ni sulisarsimalluni.
”Angallassisartuunera nuannarisimaqaara. Misigisarpassuaqarpunga tikeraallu pitsaasumik misigisaqartinniarlugit inuunerma sinneranut misilittagarpassuaqalersimallunga, ilaatigut oqaluttuanik oqaluttuuttarnerisigut, soorlu tamaani najugaqartuinnaat oqaluttuarisinnaasaannik. Soorlu mittarfimmiit ingerlanermi igalaakkut tikkuaannarsinnaasarpunga oqarlunga: ”Aataga qamani iliveqarpoq”, tamannalu takornariat eqiiallaatigisarpaat,” oqarpoq.
Taamatut piviusorpalaartumik saqqummiussineq takornariaqarnerup siunissami ineriartortinneqarnissaani aalajangiisuusumik pitsaassuseqartutut isigaa.
”Najukkami nerisassat, najukkami ilisimasat aamma inuttut oqaluttuat misigisaqarnermut pikkunarsisitsisarput. Namminermi angalagaangatta aamma tamanna ujartortarparput,” oqarpoq.
Kommunip sakkussaa tapersersorneqarluartoq.
Visit Ilulissat kommunimit tamakkiisumik pigineqarluni ApS-itut pilersinneqarpoq, suliassanillu kommunip nammineerluni toqqaannartumik isumagisinnaanngisaanik isumaginnittussaalluni. Ilaatigut umiarsuarnik takornariartaatinut tunngatillugu ataqatigiissaarineq kiisalu nunanit tamalaaneersunik suleqateqarluni oqaloqatigiinneq, kiisalu najukkami suliffeqarfiit suliassanik isertitaqarnermillu pitsaanerusumik periarfissaqarnissaat qulakkeerniarlugu.
Siulersuisut katiterneqarsimapput inunnik naalakkersuinermik toqqammavilinnik inuussutissarsiornermilu misilittagartuunik.
Karsten Høy naapertorlugu toqqammavik inissinneqareerpoq. Kalaallit Nunaat nunani tamalaani ersarinnerulerpoq, ukiullu naanerani mittarfik nutaaq ammarneqarpat Ilulissat kommunilu tamakkerlugu suli amerlanerusunit tikikkuminarnerulissaaq.
“Maannakkut annertuumik pisorpassuaqareerpoq. Ilaatigut Upernavimmi Kullorsuarmilu aallartisaasunut pikkorissartitsisoqarpoq, takornariaqarnerlu pillugu soqutiginninneq annertusiartorpoq. Maanna Visit Ilulissat ataqatigiissaarinermut ineriartortitsinermillu tapersersuinermut peqataassaaq,” oqarpoq.
Peqatigitillugu erseqqissarpaa, takornariaqarneq taamaallaat suliffinnik toqqaannartumik pilersitsineq ajortoq, aammali assartuinermi, eqqiaanermi, caféni, niuertarfinni kiisalu sullissinermi suliffinnik pilersitsisartoq.
“Tamanna kisitta kivissinnaaneripput qularnarpoq. Suleqatissanik nukittuunik, ilaatigullu nunanit tamalaaneersunik soqutiginnissinnaasunik amerlasuunik peqarpoq. Aamma kommunip, inuussutissarsiornermik ingerlatallit ilinniarfiillu akornanni suleqatigiinnissaq pisariaqarpoq. Tassani Visit Ilulissat malunnaatilimmik sunniuteqarsinnaavoq,” oqarpoq Karsten Høy.
__________________________________________________________________________________________
Pillugu: Visit Ilulissat
Ateq: Visit Ilulissat
Piginnittoqarneq: Kommunimit tamakkiisumik pigineqartoq
Siunertaq: Ilulissani illoqarfiullu ungataani takornariaqarnermik ineriartortitsinerup nukittorsarnissaa ataqatigiissarnissaalu
Suliassat:
– Najukkami takornariaqarnerup ineriartortinneqarnera tapersersussallugu
– Kommunip, inuussutissarsiornermi ingerlatallit takornariaqarnermilu suliaqartut akornanni attaveqaataassalluni
– Umiarsuarnik takornariartaatinut aammalu nunanit tamalaaneersunik suleqatissanut tunngatillugu oqaloqatigiinnermik ataqatigiissaarineq
– Suliassat naleqarnerulersitsinerullu naligiinnerusumik agguarneqarnissaat anguniassallugu
Pisortaq: Karsten Høy (1. februar 2026 atorfinittoq)
Siulersuisut – Visit Ilulissat
Visit Ilulissani siulersuisut najukkami tunngaveqarluartumik kiisalu takornariaqarnermi, unnuisarfinni inuussutissarsiornermilu misilittagaqarluartunik katitigaapput. Siunertarineqarpoq takornariaqarnerup ineriartortinneqarnissaa najukkami suleqatigisat qanimut suleqatigalugit aammalu ingerlatsinermut ineriartortitsinermullu paasisimasaq tunngavigalugu.
Laila Sandgreen, siulittaasoq. Ukiuni arlalinni aalisarnermik inuussutissarsiuteqarnermik misilittagaqarpoq kiisalu takornariaqarnermik ilisimasaqartuulluni ilaatigut Isortaq Trawl, Hotel Nuka aamma Ilulissat Explorer aqqutigalugit.
Ujuut Olsen, siulittaasup tullia. Qaanaameersoq aammalu Avannaata Kommuniani Takornariaqarnermut Ataatsimiititaliap siulittaasua. Suliffeqarfiup sulinerata politikkikkut tunngaveqarnissaa kiisalu takornariaqarnerup Avannaata tamakkerlugu ineriartortinneqarnissaa qulakkeerniarlugu suleqataassaaq.
Jan Cortzen, takornariaqarnermi ingerlataqartoq, Ilulissat Excursions ApS-imi pilersitseqataasoq aammalu piginnittunut ilaalluni.
Pilunnguaq Magnussen, takornariaqarnermi ukiuni arlalinni misilittagalik aammalu Ilulissat Escape-p piginnittua.
Bent Petersen, unnuisarfinnut sinniisoq aammalu Ilulissat Apartmentsip piginnittua.