Avannaata Kommunia kommunip illoqarfiini nunaqarfinnilu eqqagassanik suliaqarnermut tunngatillugu nutaamik aaqqiissuteqarnissamut isummersorpoq.
Borgmesteri Lars Erik Gabrielsen ilaasortallu Teknikkimut ataatsimiititaliameersut qanittukkut Amerikami illoqarfimmut Skagwaymut pulaarput, tassani containerinik tunngavilimmik ikuallaavimmik paasisassarsiorlutik.
Ikuallaavik plug & play-itut ilusiligaavoq, containerinut nalinginnaasunut pingasunut inissinneqartoq, kommunillu neriuutigaa tamanna siunissami eqqagassanik suliaqarnermi ilaatinneqarsinnaassasoq.
Eqqakkat katersuutiinalerput
Kommunimi inoqarfinni arlalinni ukiup qaammataani tallimani-arfineq marlunni sikuusarpoq. Piffissami tassani umiarsuakkut eqqagassanik assartuineq ajornarpoq, taamaattumillu eqqagassat sivisuumik sumiiffinni ataasiakkaani allatut ajornartumik toqqortarineqartarput.
Peqatigisaanik kommunip illoqarfiini nunaqarfiinilu ikuallaaviit mikinerit matuneqarsimapput, tamannalu eqqakkat annertusiartuinnarnerannik annertuumik ilungersunartorsiortitsilersimavoq.
“Maannakkut eqqagassanik ammasumik ikuallaasinnaanermut immikkut akuersissuteqarpugut, kisianni tamanna avatangiisinut piujuartitsinermik tunngaveqanngilaq – sulisut pujormiuullutik mingummiuullutillu sulisariaqarnerat aamma eqqarsaatigalugu,” borgmesteri Lars Erik Gabrielsen oqarpoq.
“Containerinut inissinneqartumik ikuallaaviup ilusaa nunani tamalaani aniatitsinermut piumasaqaatinik naammassinnippoq, aammalu eqqakkat katersuutiinnalerlutik annertusiartuinnalernissaraluannut pinngitsoortitsisinnaallutik; soorlu aput aakkaangat tipi niviukkallu akornutaaqisut takkuttarput. Pissutsinik taamaattunik innuttaasunut, inuussutissarsiortunut imaluunniit sulisunut eqqakkanik suliaqartunut atugassaqartitsisinnaanngilagut,” borgmesteri oqarpoq.
Containerinut tunngavilimmik ikuallaaneq
Aaqqiissut kommunip maanna suliniutigilersaagaa tassaavoq canadamiunit amerikamiuniillu suliffeqarfimmit Eco Waste Solutions-imit taaguuteqartinneqartoq ECo Mobile Thermal Waste Conversion System.
Atortulersuut taamaattoq containerinik pingasunik sananeqaateqarpoq, taakku ataatsimut katillugit ikuallaavittut tamakkiisutut atorneqartussanngorlugit aaqqissuunneqarlutik, tassanilu pujoorfik 10 meterit miss. portutigisoq kiisalu kissassutsimik qaffasissumik ikuallaaveqarluni. Systemi ineriartortinneqarsimavoq sumiiffinni avinngarusimasuni atorneqartussanngorlugu, tassani eqqakkat sumiiffimmi nammineq passunneqartariaqartarmata.
Suliffeqarfiup tunisassiortup paasissutissiissutigaa, eqqakkat kissassutsimi 1.000 gradit tungaanut ikuallanneqarsinnaasut, aammalu aniatinneqartut nunani tamalaani avatangiisinut piumasaqaatinik naammassinnittut. Aaqqiissut taanna nunarsuarmi sumiiffinni assigiinngitsuni atorneqareerpoq, ingammik eqqakkat sumiiffinnit assartorneqarnissaat ajornakusoortillugu. Assersuutigalugu sakkutooqarfinni kiisalu najugaqarfinni avinngarusimasuni atorneqartarpoq.
Borgmesteri Avannaata Kommuniani Teknikkimut ataatsimiititaliap siulittaasuanit, Sakio Fleischerimit (S), kiisalu ataatsimiititaliamut ilaasortamit illuatungiliuttuneersumit, Niels Erik Bromit (D), tapersersorneqarpoq.
“Siusinnerusukkut ima amerlatigisunik katersuutiinnalersunik eqqakkanik peqarnikuunngilagut, aammalu eqqakkanik passussinermut atatillugu ima annertutigisunik unammillernartunik peqarnikuunata, taamaattumillu nutaanik aaqqiissuteqartariaqarpugut,” taakku marluk oqarput.
Borgmesteri neriuuteqarpoq, Namminersorlutik Oqartussat pilertortumik akuersissuteqarnissamut suleqataassasut.
“Siusinnerusukkut containerinik aaqqiissuussineq taanna misissoreernikuuarput, tamannalu piumasaqaatitsinnut naapertuuppoq eqqakkat ingerlaavartumik aammalu isumannaatsumik piujuartitsinermillu tunngaveqartumik passunneqarsinnaanissaannut. Sukkasuumik akuersissuteqarup minnerpaamik malitsigisinnaavaa, containerit taamaattut marluk pisiarineqarnerat, avannaani kommuni containerit atorlugit ikuallaasalernissamik misileraanissaa siunertaralugu, Lars Erik Gabrielsen oqarpoq.
Ukioq kaajallallugu eqqakkanik passussisinnaavoq
Containerinik atortulersuuteqarnermi eqqakkat sumiiffinni ingerlaavartumik passunneqarsinnaapput, aamma ukiup qaammataani. Tamanna atuuppoq illuni nalinginnaasumik eqqakkanut, perusuersartarfinnit katersukkanut kiisalu uumasut toqungasunut, taakkumi ullumikkut amerlasuutigut sivisuumik toqqortarineqartariaqartarmata, assartorneqarsinnaalernissaasa tungaanut.
Skagwaymut tikeraarnermi aallartitat Niel Klugimit, solid waste operator-imit atortulersuummi ingerlatsinermut akisussaasumit, takornariartinneqarput.
Taassuma ilaatigut erseqqissaatigaa atortulersuut ajornanngitsumik aserfallatsaaliorneqarsinnaasoq.
“Uagut nammineq amerlanerpaatigut nungullariartorlutik taarserneqartussanik taarsersuisarpugut, aammalu qaammatini 8-10-nut naammattunik kingoraartissamaateqartuaannartarpugut, qanoq annertutigisumik ikuallaasarnerput apeqqutaatillugu, tamatigut taartissanik peqareerluta. Taamaattumik qaqutigoortorujussuuvoq atortulersuut ajoquteqalerluni uninngasariaqartarnera,” Niel Klug, Skagwaymi Eco Solutions-imi Solid Waste Operator oqarpoq.
Sukkasuumik akuersissuteqarnissaq neriuutigineqarpoq
Ullumikkut illoqarfinni sikusartuni eqqakkanik passussineq annertoorujussuarmik immikkoortiterinermik, toqqortaqarnermik aammalu qaammaterpassuarni passussinermik pisariaqartitsivoq, eqqakkat umiarsuakkut assartorneqarsinnaalernissaasa tungaanut.
Taamaattumik borgmesteri neriuuteqarpoq Namminersorlutik Oqartussat containerinut tunngavilimmik ikuallaavinnik sukkasuumik akuersissuteqassasut, taamaalillutik siulliit kommunip illoqarfiisa ilaanni marlunni ukiumi tullermi atorneqalereersinnaaniassammata.
“Akuersissutit inissinneqarpata, periarfissinneqassaagut eqqakkat sumiiffinni ingerlaavartumik passussinnaallugit qaammaterpassuarni annertuunik katersuutiinnalersillugit uninngatinnagit,” borgmesteri Lars Erik Gabrielsen, Avannaata Kommunia oqarpoq.
