Ilulissani imeqarfiup killeqarfianut aaqqiissut isumaqatigiissutaasoq
Imeqarfiup maannamut killeqarfiata nuunneqarlunilu annikillisinneqarnissaa, peqatigisaanillu siunissami imermik pilersuinerup annertusineqarsinnaanera siunertaralugu, Kangerluarsuup Qinnguani imeqarfiusinnaasumi imermik isumalluutit misissorneqarnerisa aallartinneqarnerat, aaqqiissutip malitsigaa.
Naalakkersuisut danskillu naalakkersuisuisa akornanni Kalaallit Nunaat imminut napatittoq pillugu ataatsimut sinaakkutitut isumaqatigiissutip iluani suliniutip aningaasalersorneranut periusissap qulaajaaviginissaa maanna suliarineqarpoq.
Imeqarfiup killeqarfia annikillineqarpoq
Ullumikkut Ilulissani imeq imigassaq tatsinit minnerusunit arlalinnit, tamarmik imeqarfimmut killeqarfimmik unguneqarsimasunit katersorneqartarpoq. Tatsinilli taakkunannga imeq nunami tassani qutsinnerusuminngaanneerpoq. Imermik milluaasup tasermut erngup katersorneqartup annertunerpaartaanut nuunneratigut, illoqarfimmi imeq annikillisinngikkaluarlugu imeqarfimmut killeqarfik annikillisinneqarsinnaavoq.
Taamaalilluni immikkoortoq ullumikkut imeq imigassaq eqqarsaatigalugu killilersorneqaraluartoq atorneqarsinnaanngortinneqassaaq. Tamanna taarsiullugu illoqarfiup ineriartortinneqarneranut sammisanullu kiisalu immaqa aamma mittarfimmut aqqusinermut nutaamut atorneqarsinnaavoq.
Aaqqiissut pitsaasoq siunissami periarfissanik amerlanernik ammaassisoq
Peqatigisaanik Kangerluarsuup Qinnguani tasermi nutaatut imeqarfiusinnaasumi imermik isumalluutit misissorneqarnerat aallartinneqassaaq. Taamaaliornermi erngup pitsaassusaa imerlu tassunga kuuttoq piffiup tatsillu siunissami imermik pilersuinermi ilapittuutitut atorneqarsinnaaneranut paasissutissanik katersinissaq siunertaavoq. Tamanna mittarfik nutaaq ammarpat taamatullu aamma siunissami piffimmi ineriartornermik allamik pisoqarpat naapertuussinnaavoq, soorlu immami itisuumi talittarfiliornermi.
Misissuinerit Ilulissat ineriartornerat ilutigalugu imermik pilersuinermi siunissami pitsaanerusumik toqqammavissinnissaanut ilapittuissapput.
Inuussutissarsiornermut, Aatsitassanut, Nukissiuuteqarnermut, Inatsisit atuutsinneqarnerannut Naligiissitaanermullu Naalakkersuisoq Naaja H. Nathanielsen ima oqaaseqarpoq:
”Imermik imigassamik illersuillunilu Ilulissani ineriartornermut periarfissiisumik aaqqiissusiorniarluta Avannaata Kommunianik oqaloqatiginninnerit pitsaasut ingerlappavut. Aaqqiissutikkut maanna toqqarneqartukkut imermik pilersuinermi maanna unammillernartitat passussinnaavagut, peqatigisaanillu illoqarfiup nangittumik ineriartorneranut sinaakkutinik pitsaanerusunik pilersitsilluta.”
Avannaata Kommuniani borgmesteri, Lars Erik Gabrielsen ima oqaaseqarpoq:
"Qujamasuutigaarput Naalakkersuisut aamma Avannaata Kommunia maannakkumut qanimut suleqatigiillutik Ilulissani periarfissanik nutaanik pilersitseqatigiimmata. Siunissami periarfissanik nutaanik ammaassivoq aamma illoqarfimmut ineriartortitseqataasussaavoq.
Tamanna motoorilinnik ingerlaartartunut, qimussertartunut ulluinnarni imeqarfiup killeqarfiinik sunnigaasartunut iluaqutaassaaq tamatumalu saniatigut imeqarfipput illersussavarput.
Nuannaarutigaarput oqaloqatigiinnikkut qanimullu suleqatigiinnikkut kikkunnut tamanut iluaqutaasussamik aaqqiissummik nassaarsinnaagatta".
Aningaasaqarnermut Akileraartarnermullu Naalakkersuisoq Múte B. Egede, ima oqaaeqarpoq:
"Ilulissat nunap immikkoortuata ineriartorneranut illoqarfiuvoq pingaarutilik, peqatigisaanillu pilersuinermut siuariartornermullu sinaakkutinik eqqortunik pilersitsinissarput pingaaruteqarpoq. Illoqarfiup siuariartornissamut pisariaqartitaanik tunniussinissatsinnut piffissanngorpoq."
Piffissamut pilersaarutaagallartoq
Suliniut aningaasalersorneqarsinnaappat, immikkoortuni arlinni ingerlanneqassaaq:
- 2026: Oqartussat suliaqarnerat, neqeroortitsineq suliariumannittussarsiuussinerlu
- 2027: Imermut aqqummik sanaartorneq aallartinneqassaaq
- 2028: Suliaq naammassineqassaaq, aaqqissullu nutaaq ukiup naanerani atorneqalissaaq
Peqatigisaanik Kangerluarsuup Qinnguani tasermik misissuineq sapinngisamik piaarnerpaamik aallartinneqassaaq, ukiunilu arlalinni imermik isumalluutit pillugit paasissutissatut tunngavissanik patajaatsunik pilersitsiumalluni nanginneqassalluni.
Alloriarneq tulleq
Suliniutip aningaasalersorneqarnissaa qulaajaaviginiarlugu suliat danskit naalakkersuisuinik oqaloqatiginninnikkut nanginneqassapput. Aningaasalersuutissat inissippata, suliap ingerlanneqarnissaanut piffissamullu pilersaarummik inaarutaasumik aalajangiisoqassaaq.
Paasissutissat erseqqinnerusut pillugit Inuussutissarsiornermut, Aatsitassanut, Nukissiuuteqarnermut, Inatsisit atuutsinneqarnerannut Naligiissitaanermullu Naalakkersuisoqarfimmi naalakkersuisup allattaa Jeanette L. Petersen attavigiuk. E-mail: jalp@nanoq.gl
