Innuttaasut Qaanaameersut, Upernavimmeersut, Uummannameersut Ilulissaneersullu maajip 8-niit 30-iata tungaanut Ilulissani pikkorissarnermut 12-pax-imut peqataapput.
Pikkorissarneq Majoriaq aamma Avannaata Kommunia suleqatigiissutigalugu ingerlanneqarpoq, Imarsiornermik Ilinniarfiullu ilinniartitsineq isumagaa. Pikkorissarnermi peqataasut ilaatigut motorilerineq, usit ulorianartut, sumiissusersiorneq aamma imarsiornermi maleruagassat pillugit ilinniartinneqartarput.
Ilinniartitsineq AMA-pikkorissarnertut aaqqissuunneqarpoq, peqatigisaanillu Avannaata Kommuniata tapersersugaanik misiliutigalugu ingerlanneqarluni. Siunertaavoq takornarianik imaani angallassinermi piginnaasat nukittorsarnissaat, aamma Nunatta Avannaani innuttaasut periarfissaqarnerulersinnissaat.
Borgmesteri Lars Erik Gabrielsen pikkorissartunut pulaarpoq peqataasullu ilassillugit.
”Illoqarfinnit nunaqarfinnillu allanit peqataasoqarnera nuannaarutigeqaarput. Kissaatigaarput amerlanerit ilinniarnissamut ineriartornissamullu periarfissanik assingusunik aamma periarfissinneqarnissaat. Peqataasut taama amerlatigisut kajumillutik peqataasut takullugit nuannaarutigaara. Suleqatigiikkaanni iluatsitsisoqarsinnaavoq, aamma arlaatigut tamanna ajornakusoortutut isikkoqaraluaraangalluunniit. Ilissi atorfissaqartippatsigit, tamassilu ajunnginnerpaamik kissaappassi,” borgmesteri oqarpoq.
Pikkorissarneq pilersaarusiorneqarsimavoq peqataasut ilinniartitsinerup naammassinerata kingorna aasaanerani ulapiffiusumi sulilersinnaanngorlugit aaqqissuunneqarpoq, tassani takornariaqarnermi imaatigullu angallassinermi sulisussanik piginnaasalinnik pisariaqartitsineq annerpaajusarmat.
”Pingaaruteqarpoq takornariaqarnermi sulisinnaasunik amerlanerusunik ilinniartitsinermi peqataassasugut, aamma Avannaani innuttaasut amerlanerusut inuussutissarsiornermut nukittorsaataasinnaasumik pikkorissarnermik naammassinnissinnaanissamut periarfissaqassasut,” borgmesteri Lars Erik Gabrielsen oqarpoq.
12-pax-imut uppernarsaat angallatinik 15 meterinit naannerusunik, Kalaallit Nunaata sineriaani amerlanerpaamik 12-inik ilaasoqarlutik angalasartunik, ingerlatsisinnaanermut pisinnaatitsisarpoq.
Pikkorissarneq pillugu paasissutissat
Pikkorissarneq maajip 8-anniit 30-annut ingerlanneqassaaq
Pikkorissartut katillugit 20-t peqataapput
Peqataasut ukunaneersuupput:
Qaanaaq
Siorapaluk
Upernavik
Upernavik Kujalleq
Kullorsuaq
Uummannaq
Ilimanaq
Qeqertaq
Ilulissat
