Maanna qinersinermit kingullermit piffissaq Qaasuitsup Kommunianut qaangiukkaluttuaalerpoq kiisalu uanga maanna naalakkersuinikkut suliaqarninniit tunuarninnut atatillugu ukiumi nutaami nukiit nutaat tigusisussanngorput.
Taamaattumik piffissaq kingulleq suliniutit aallartisarneqarsimasut aamma suliniutit annertuut aallartisarneqalersut allanut ingerlateqqinneqarnerat kingumut qiviarfigilaarpara.
Kommunalbestyrelsip Ikaarsaariarnermi ataatsimiititalianut marluusunut ilerasuuteqarnani tunniussinissami tunngaviuvoq qinersivik tamaat ingammik ukioq missingersuusiorfiusoq 2017 Qaasuitsup Kommuniata aningaasaqarnikkut siuariartorsimanera. Taamatut ineriartorneq aamma ilimagisaqarsimaneq taamaalilluni eqquuppoq kiisalu ukioq missingersuusiorfiusoq 2017 111 mio. Kr.-nik karsimi uninngasuuteqarluni kommune unittussanngorpoq.
Naak mittarfissaq suli utaqqititsigaluartoq taamaattoq Qaasuitsup Kommuniata Ikaarsaariarnermi ataatsimiititaliaq paaseqatigalugu suliniut annertooq “Iluliisat illoqarfiata allilerneqarnera” maanna aallartiluareersoq sulissutigisimavaa. Utaqqisatuaavoq avatangiisit pillugit nalunaarusiaq 2018-imi februaarip qaammataanut kinugartinneqarnikoq. Taanna inisseriarpat Ilulissani mittarfiup allilerneqarnera pillugu Kalaallit Airport-ip pilersaarutaa ineriartortitsinissamut pilersaarutinut avatangiisitigut killiliisuusoq saqqummiussineranut atatillugu illoqarfiup ineriartortinnissaanut pilersaarut tusarniutigineqassaaq.
Ilulissani illoqarfiup ineriartortinnissaanut aaqqiissutaasinnaasoq Qaasuitsup Kommuniata aamma Avannaata Kommuniata naliliinerat naapertorlugu tassaavoq kommuni imminut napatittoq imminerminut aamma avatangiisinut oqimaaqatigiissumik takorluugaq. Taamaattumik nunap immikkoortuani ineriartortitsinerup siunissamut qulakkeerneqarnissaa kommunimut unammillernartuusussaavoq, Ilulissanuinnaanngitsoq aamma Qeqertarsuup Tunuanuinnaanngitsoq aamma avannaanut tamanut.
Taamaattumik Qaasuitsup Kommuniata aamma Avannaata Kommuniata nalilerpaat, Avannaata Kommunianut ineriartorneq malunnaatilimmik aallartinneqassappat suliniutit tamarmik imminut akilersinnaassuseqarnissaata salliutinneqqarnerat.
Ineriartornerup aallartisarneqarnissaanut periusissaq:
1. Qaartiterutaasiviup/paassiviup avannamut nuunneqarnera.
2. Imeqarfiup killeqarfiata Kangerluarsuup qinnguanut nuunneqarnera.
3. Suliffissuaqarfimmi nutaami eqqakkanik immikkoortiterivimmik pilersitsineq.
4. Atersuit avaqqullugit mittarfeqarfimmut aamma kangerluarsuup tungaanut nutaamik aqquserngiorneq. Taamaaliornikkut sumiiffik akilersinnaanerusumik allanut periarfissiissaaq.
Taamatut iliuuseqarnerit illoqarfimmi kisianni aamma kommunip sinneranut inussutissarsiuteqartunut inerirtortitsinissamut aningaasalersuinissamut soqutiginnilersitsissaaq.
Qaasuitsup Kommuniata aamma Avannaata Kommuniata qularutiginngilaat suliniutini ataani taakkartorneqartuni inuussutissarsiutitigut inatsisilerituut naliliinerattut illoqarfiup- aamma nunap immikkoortuani ineriartortitsineq imminut akilersinnaassuseqarlutik ingerlanneqarumaartut.
a. Pisuussutinik uumassusilinnik imminut napatissinnaasumik atuineq
b. Talittarfiliorneq
c. Aqqusinernik annertusaanerit
d. Timersortarfissuup matusap sananeqarnera
e. Timersortarfisusarmut atasumik naluttarfik
f. Illoqarfiup iluani kusasaanerit aamma eqqakkanik passussineq
g. Nuuaarsuup aamma Kangerluarsuup tungaanut inisssiaqarfiusunik, ataatsimut katersuuttarfinnik kiisalu suliffissuaqarfisunik illoqarfiup allilerneqarnera
Sumiiffik taanna pillugu nassuiaasiortoqassaaq naalakkersuinikkut aalajangernissamut tunngavissat inissinneqariarpata kiisalu aningaasalersueriaatsimi OPP-mik taaneqartartumi (pisortat aamma namminersortut aningaasalersueqatigiinnerat) aaqqissut sorleq Ilulissani aamma avqannaani imminut napatittumik ineriartortitsineq pillugu Avannaata Kommuniata kommunalbestyrelsiata Naalakkersuisunut inassuteqarnissaa.
Kommuni imminut oqimaaqatigiissoq uppernarsarniarlugu aamma tunngavilersorniarlugu Qaasuitsup Kommunia København-imilu Universiteti suleqatigiillutik ulluni 9. – 12. April 2018 siullermik Qeqertarsuup tunuani imminut pilersorsinnaaneq pillugu isumasioqatigiissitsinissamik pilersaarusiorsimapput.
Ukiumut qaangiuttumut qujalluta Qaasuitsup Kommuniani innuttaasut tamaasa sulilluarsimanerinut qujassuteqarluta taamaalilluta ernummateqarnata ukiup nikinneranni Avannaata Kommuniani Borgmesterimut Palle Jeremiassen-imut aquut tunniussinnaanngorparput.
Ukiortaami pilluaritsi
Borgmester
Ole Dorph
Qaasuitsup Kommunia
Ikaarsaariarnermut ataatsimiititaliamut Siulittaasoq
Palle Jerimiassen
Avannaata Kommunia