Uummannap avannaq-kimmut (inissiaqarfik A12) alliartortinnera malillugu illoqarfimmi illoqarfiup qeqqatut atuuffiit ilanissaannik taamatuttaaq pisariaqartitsisoqarpoq. Taamaattumik kommunip pilersaarutaanut tapiliut manna aqqutigalugu illoqarfiup qeqqanut siunertanut, meeqqerivittut, atugassanik pisiniarfittut, inissiatut, kiisalu akunnittarfittut assingusutullu unnuisitsisarfittut ittunut sanaartorfissat atugassiissutigineqarput.
Kommunip pilersaarutaanut tapiliussaq kommunalbestyrelsemiit akuerineqarpoq kommunip piler-saarutaanut tapiliussaq nr. 68 matumuuna pisortatigoortumik saqqummiunneqarpoq.
Kommunip pilersaarutaata tapiata siunertaa:
Pilersaarummut siunertaq tassaavoq Uummannap kippasissortaanik pingaarnertut kiffartuussiffiusussanik illoqarfiup qeqqani atuuffissanik atugassiinissaq. Meeqqerivimmik, atugassanik pisiniarfimmik, inissianik, kiisalu akunnittarfimmik assingusutullu unnuisitsisarfinnik sanaartornissamut kommunip pilersaarutaanut tapiliut periarfissiivoq.
Kommunip pilersaarutaanut tapiliussaq sapaatit akunnerini arfineq-pingasuni tamanut tusarniutigineqarnikuuvoq, tamatuma ingerlanerani innuttaasut, suliffeqarfiit il.il. akerliliissutinik, oqaaseqaatinik allannguutissatullu siunnersuutinik saqqummiussisinnaasi-mapput.
Sanaartorfissat inuttaqanngitsut
Matumuuna ilanngullugu nalunaarutigineqassaaq, sanaartorfissanut inuttaqanngitsunut nunaminertamik tunineqarnissamut qinnuteqartoqarsinnaammat. Kommunep pilersaarutaani aalajangersakkani §5.2 aamma 5.3-mi sanaartorfissat inuttaqanngitsutut ussassaarugineqassapput sapaatit akunnerini 6-ni. Sanaartorfissaq nr.2-mi nunaminertamik qinnuteqartoqarsinnanngilaq, tassani pisortat paaqqinnittarfimmik sanaartortitsissammata.
Nunaminertaq sanaartorfiusinnaasoq sanaartorfigineqanngitsorli nunaminertamik atuisinnaanermut qinnuteqarfigisinnaavat NunaGIS aqqutigalugu aamma kommunip nittartagaa aqqutigalugu qinnuteqarluni immersugassaq aasinnarlugu immersorneqassaaq, uaniittoq: www.avannaata.gl. Inummit imaluunniit suliffeqarfimmit ataatsimit qinnuteqaat ataasiinnaq immersoqqusaavoq, inuttut ataasiinnartut allassimasussaq aamma inatsisit malillugit ataasiinnarmik atuarneqarsinnaassaaq. Qinnuteqaatit tamarmik pappiliartaat nassiunneqartut aallaavigalugit nalilersorneqarumaarput. Nunaminertaq sanaartorfissaq qinnuteqartunit arlalinnit assigiimmik akuersivigineqarsinnaatillugu kommuni akuersissummik tunniussisinnaajumalluni makitsisariaqassaaq.
Qinnuteqaatit tamarmik makkunannga imaqassapput:
1. Sanaartugassap ilusissaatut siunnersuut, sanaartukkap inissisimaffissaanik, isikkussaanik atortullu suut atorlugit sananeqarnissaanik nassuiaatitalik.
2. Sanaartukkap sumut atorneqarnissaanik paasissutissat.
3. Teknikkikkut atortut ikkusuunneqartussat pillugit paasissutissat.
4. Aningaasaqarneq pillugu paasissutissat, qinnuteqaatip piviusunngortitsisinnaaneranik uppernarsaatitut atorneqartoq.
Piffissaliussat aamma suliat pilersaarutaat:
13.02.2019: Ulloq taanna aallarnerfigalugu sanaartorfissani nunaminertamik atuisin-naanermik qinnuteqaatit nassiunneqarsinnaapput.
27.03.2019: Nalunaaqutaq 16:00 nunaminertamik atuisinnaanermik qinnuteqaatit tigooqqarneri siullermeertumik matussapput.
Tamatuma kingorna sanaartorfissaq suli sanaartorfigineqarsimassanngippat nunaminertamik atuisinnaanermut qinnuteqaatit qaqugukkulluunniit qinnutigineqarsinnaapput.