Illu atuareernermi ornittagarineqalersoq siornatigut timikkut pisinnaasakinnerusut utoqqaallu najortagarisimagaluarpaat.
- Atuareernermi ornittagaq ilaneqanngikkallarmat meeqqani uumilasoqartarlunilu puullaaqisoqartaqaaq, taamaammallu aaqqiagiinngittoqaleraangat sulisut akuliutikulasarsimapput. Maannakkullu inissaqarneruleriaratta meeqqat ilorrisimaarnerujussuanngorlutik imminnut akuersaarnerulerlutillu nuannaarnerulerput, David Qujaukitsoq Qaanaami Peqqinneq Sunngiffiullu immikkortortaani aqutsisuusoq unnersiorpoq.
Sulinermi atugarissaarnerulerput
Maanna atuareernermi ornittakkat illuni marluniilerput, illoqarfiullu meerartaat 80-it missaanniittut taakkununnga agguataarneqarsimalerput. Ornittakkani katillugit arfineq marlunnik sulisoqarpoq, taakkunanilu aamma pitsanngoriaateqartoqarpoq.
- Maanna inissaqarneruleriaratta meeqqat akornanni uumilaqqajaanerit tusarsaajunnaarput, aamma sulisut sulinerminni atugarissaarnerulermata qutsannarput, siornatigummi inissakilliornermik peqquteqartumik ipianngunerujussuaq atugaasimagaluarmat, David Qujaukitsoq oqarpoq.
Atuareernermi ornittakkameersut ininut nutaanut sapaatip akunnerani kingullermi iserterput. Ornittagarlu unnukkut inuusuttunut ornittakkatut atorneqalermat illoqarfiup inuusuttai aamma atugarissaarnerulersinneqarput.
Allattoq: Káte Hansen, khan@avannaata.gl
Assit: Peqqinneq Sunngiffillu, Qaanaaq
