Aalisartut piniartullu pingaartumik piniartuunermiit aalisartunngornermut ikaasaariarnermi aningaasatigut isertitaqarnerulernerisa kingorna aningaasaqarniarnikkut pitsaanerusumik aqutsisinnaalernissaat anguniarlugu pikkorissartoqarnissaa Avannaata Kommunianit kissaatigineqarpoq.
Pikkorissarneq Avannaata Kommuniata aammalu siunnersuisarfiup AMMA Consultingip Siverth Amondsenimit suliffiutigineqartup akornanni suleqatigiissutigalugu piviusunngortinneqartoq septembarip 19-ani 20-anilu ingerlanneqarpoq.
Sammisat assigiinngitsut aalisartut piniartullu inuussutissarsiutiminnik aallussaqarnerminni ilisimasariaqagaat pikkorissaanermi sammineqarput.
- Assersuutigalugu piniarnermut inatsit, akiliisitsilluni piniartitsineq aalisartitsinerlu, sumiiffiit pisassaqarfiit pisassaqarfiunngitsullu aammalu namminersortutut suliffeqarfeeraatigisaq allilerniarlugu qanoq iliorluni anginerusumik angallatitaarniarsinnaaneq sammivagut. Tamatumani ESU-mut qinnuteqaasioriaatsit aammalu aallarnisaasutut akiliunneqarluni periarfissiissutit atorlugit inatsisilerituunit, eqqartuussissuserisunit imaluunniit siunnersortinit siunnersorneqarnissamut periarfissat eqqartorpagut, Siverth Amondsen AMMA Consultingimeersoq nassuiaavoq.
Aammali naatsorsuutit, missingersuutit aamma ukiumoortumik nalunaarusiat allarpassuillu ulluni marlunni pikkorissaanermi eqqartorneqarput.
- Uanga inuttut ataasiakkaatut suliffeqarfittullu aningaasaqarniarnerup assigiinngissutaat aammalu aningaasanik aqutsisinnaanerup qanoq iluaqutaatigisinnaanera pingaarnertut ilikkagaqarfigaakka. Pikkorissarneq tamanit pissarsiaqaataatigineqarpoq, maluginiarparalu illoqarfitsinni aallarnisaarusussuseq sakkortuseriartoq, Mads Ole Kristiansen issittumi takornariartitsisutut suliffeqarfimmik Nunataq Atsuk Travelimik piginnittoq oqarpoq.
Pikkorissaqataasut pikkorissareernerup kingorna ilikkakkatik pillugit pikkorissaasumik Siverth Amondsenimik qaammatip naanissaata tungaanut ataasiakkaarlutik oqaloqateqarnissaminnut periarfissinneqarput.
Allattoq: Káte Hansen, khan@avannaata.gl
Asseq: Nammineq pigisaq