Aggustip qaammataani Qaanaaliarnissaraluaq kingorna oktobarimi novembarimilu piviusunngortinniarneqarsimagaluarpoq. Tikeraarnissarlu kiisami maanna piviusunngortinneqartussanngorpoq. Taamaasilluni borgmesterip Avannaata Kommuniata kommuninngornerata kingorna Qaanaaq perngaammik tikeraartussanngorpaa.
- Qaanaami innuttaasunik, nunaqarfimmi aqutsisunik inuussutissarsiutinillu ingerlatsisunik naapitsinissara qilanaaraara. Borgmesterinngoramali Qaanaamut tikeraarnissara neriorsuutiginikuuara, namminnerlu kissaataat malillugu tikeraarneq kaperlaap nalaani pisussanngorpoq, Palle Jerimiassen Avannaata Kommuniani borgmesteri oqarpoq.
Borgmesteri Palle Jerimiasseni, kommunalbestyrelsimi ilaasortat marluk Lena Ravn Davidsen Demokraatineersoq aammalu borgmesterimut aappaattut tullersortaasoq Anthon Frederiksen Partii Naleqqameersoq kiisalu atorfilittatut aningaasaqarnermut pisortaq Dorthe Løvstrøm Mathiesen, Peroriartortitsinermut Ilaqutareeqarnermullu Pisortaagallartoq Aka Grønvold aamma Peqqinneq Sunngiffimmilu Ataqatigiissaarisoq Rigmor Villadsen decembarip aqqarnaniit 14-iata tungaanut Qaanaami tikeraassapput.
Atorfilittat aamma kommunimi sulisunik naapitsiniarput.
Allattoq assiliisorlu: Káte Hansen, khan@avannaata.gl
