Avannaata Kommuniani inoqutigiinnit ataasiakkaanit eqqaavinnik anartarfinnillu sapaatip akunneranut arlaleriarluni imaarsinissamut inniminniisoqarsimagaluarpalluunniit eqqaavilerinerit anartarfilerinerillu tamarmik immikkut sapaatip akunneranut 250 koruuneqalerput.
Kommune siornatigut eqqaavilerinermut anartarfilerinermullu sapaatip akunneranut qinigassartalinnik amerlassusilinnik periarfissiillunilu akeqartitsisimagaluarpoq, taamaasilluni ataasiarluni anartarfilerineq 160 koruuneqarsimagaluarpoq, eqqaavilerineq ataaseq 190 koruuneqarsimalluni, marloriarluni eqqaavinnik imaarsineq aamma marloriarluni anartarfilerineq tamarmik immikkut 250 koruuneqarsimallutik kiisalu pingasuninngaanniit tallimariarluni sapaatip akunneranut anartarfilerinerit eqqaavilerinerillu tamarmik immikkut 350 koruuneqarsimagaluarput.
- Akinik allannguinerit assigiinngitsunik peqquteqarput. Pinngortitamik illersuerusullutalu sulisut eqqaavilerinermi anartarfilerinermilu oqimaappallaanik kivitsisarunnaarnissaat kissaatigaarput, tassami eqqagassanik oqimaappallaanik kivitsisariaqakkajuttarput. Maanna inoqutigiit eqqaavitik sapaatip akunneranut arlaleriarlutik aki ataaseq atorlugu imaartissinnaalerpaat eqqaavilerisullu oqimaappallaanik kivitsisarunnaarnissaannut peqataallutik, Sakio Fleischer, Teknikkeqarnermut Ataatsimiititaliami siulittaasoq oqarpoq.
Akinik allannguinerit kommunimi inoqutigiinnut atuuttuusut 2020-mi januaarip aallaqqaataaniit atuutilerput.
Eqqaavinnik imaarsinermut anartarfilerinermullu akit kommunip nittartagaaniittut uani atuarneqarsinnaapput:
https://avannaata.gl/Emner/Erhverv/Takstblad?sc_lang=kl-GL
Eqqaavilerinermut anartarfilerinermullu tunngasut najugaqarfigisami Sullissivimmut saaffiginnissutigineqartassapput.
Allaaserisat asserlu: Káte Hansen, khan@avannaata.gl
