Avannaata Kommuniani illoqarfinni nunaqarfinnilu atuarfiit tamarmik pingasunngornermi apriilip 15-iani atuartitseqqiffiulissapput. Atuarfiit matoqqatikkallarneqarnerisa nalaannisulli inuiaqatigiinni pingaarutilittut sulisut qitornaasa atuarfinni nakkutigineqarnerat apriilip 14-iani aamma periarfissaassaaq. Atuarfiit ammariartuaartinneqarnerat nalinginnaasumik atuartitsisoqalernissaata tungaanut atuutissaaq.
Atuartitsinermi Covid-19-ip tuniluuteratarsinnaanera pissutigalugu atuarfinnik ammariartuaartitsisoqassaaq.
Atuartut 1. klasseniit 7. klasseni atuartut, ulluni nalinginnaasuni nal. 8.00-imiit nal. 11.30-ip tungaanut atuartinneqartassapput. Atuaqatigiiaat avillugit inini atuartitsiviusuni atuartinneqartassapput, taamaasillutik atuartut imminnut qanigatik issiasinnaaniassammata.
Atuartut angajulliit 8. klasseniit 10. klasse angullugu atuartut nal. 12.00-miit nal. 16.00-ip tungaanut atuartassapput. Atuaqatigiiaat aqqaneq-marlunnit amerlaneruppata avillugit inini atuartitsiviusuni atuartinneqartassapput, taamaasillutik imminnut qanigatik issiasinnaaniassammata.
Atuarfiit 20-t ataallugit atuartuutillit nalinginnaasumik atuartitsinerat ingerlanneqassaaq, tamatumanili atuartut amerlasuukkaarlutik katersuuttannginnissaat qulakkeerneqassaaq.
Atuareernerup kingorna ornittakkat ammaannassapput, tamatumani aamma atuartut amerlasuukkaarlutik silami illulluunniit iluani katersuuttannginnissaat qulakkeerneqassaaq.
Atuarfinni eqqiaasoqakulasoqarnissaa qulakkeerneqassaaq, aammalu oqartussaasunit inassutit malillugit assaat asakulaneqartassapput.
Avannaata Kommunianiipput illoqarfiit Ilulissat, Uummannaq, Upernavik aamma Qaanaaq taakkulu nunaqarfii.
Allattoq: Káte Hansen, khan@avannaata.gl