-Kommuni tamakkerlugu ineriartortitsinissaq pingaartipparput, aammalu kommunip avannarpasinnerusortaata ineriartortinneqarnissaa sapinngisaq tamaat sulissutigalutigu, taama Palle Jerimiassen oqarpoq.
Tamatumani Ilulissat avataanni suliniutit arlallit innersuussutigalugit, assersuutigalugu Uummannami aqqusinernik asfalterineq, Qaanaami qatserisartoqarfimmik iluarsartuussineq, nunaqarfinnut arfineq pingasunut ATV-inik pissarsisimaneq il.il..
Taasuma ilanngullugu erseqqiissaassutigiumavaa, Ilulissani suliniutit ingelanneqartut amerlasuut, namminersorluni suliniuteqarnikkut ingerlataanerat. –Ilulissani sanaartornermi ingerlanneqartut amerlanersaat namminersorlutik ingerlatsisunit sanaartugaapput, kommunip ingerlatarinngisai. Assersuutigalugu inissialiorneq hotel-iliornerit, taama Palle Jerimiassen oqaluttuarpoq.
Kommune tamakkerlugu iluaqutaavoq
Borgmester Palle Jerimiassen-ip kissaatigaa erseqqissassalugu, Ilulissat ineriartortinneqarnerata ataavartumik ingerlanneqarnissaa pingaaruteqarmat.
– Ilulissat illoqarfiuvoq ineriartortoq, nalinginnaasumik takornariarpassuarnit tikeraarneqartarpugut, mittarfillu nutaaq piareerpat, naatsersuutigineqartariaqassaaq suli amerlanerusut tikittalernissaat, taamaammat ineriartortuarnissarput pisariaqarpoq. Maanili aningaasat isertinneqartartut, kommunimut tamarmiusumut iluaqutaapput, Palle Jerimiassen oqarpoq.
Ilulissat Kalaallit Nunaanni avataanit tikittartunit ornigarneqarnersaasarpoq, ukiullu tamaasa takornarissanit 40.000-it missaanniittunit orninneqartarluni.
Pitsaanersumik paasissutissiisarnissaq
Pissutsit eqqortumik nassuiaatissartaat unaavoq, kommuni tamakkerlugu suliniutit amerlasuut tamatigut ingerlanneqarmata.
- Taamaattoq pikkorinneruffigisariaqagarput tassaavoq, Ilulissat avataanni susoqarnerata ersarinnerusumik oqaluttuarisarnissaa, tassami sorpassuarnik ingerlasoqarmat, taama Palle Jerimiassen oqaluttuarpoq.
Kommunimi sanaartukkatigut suliniutit takussutissartaat ugguuna takusinnaavatit: