Meeqqat inuusuttullu kommunalbestyrelsiat Avannaata Kommunia pilersinneqartoq

- Meeqqat inuusuttullu oqariartuutigisartagaannik tusaaniartarnissaq Avannaata Kommuniani pingaartipparput. Taamaammat Meeqqat inuusuttullu kommunalbestyrelseqalernissaat kommunalbestyrelsimi ataatsimiinnermi kingullermi aalajangiupparput, tassami oqariartuutisi pitsaasumik kinguneqartarnissaat pingaartitaraarput, Palle Jerimiassen Avannaata Kommuniani borgmesteri nassuiaavoq.

Taamaasilluni kommunalbestyrelsimi ilaasortat ukiut tamaasa aningaasaliissuteqartarnermikkut Meeqqat inuusuttullu kommunalbestyrelsianni atugassiisalerniarput. Aningaasaliissutissani ukiumut millionip affaanik amerlatigisartussatut missingersuunneqartartussani ilaapput angalanermi unnuinermilu aningaasartuutit, nakkutilliisut nerisaqarnerat ullormusiaqarnerallu kiisalu ilaasortat ullormusiaqarnerat.

Meeqqat inuusuttullu kommunalbestyrelsianni ilaasortat 17-iussapput aammalu meeqqat atuarfianni angajullerneersut 13-iniit 17-inut ukiullit qinigaasinnaatitaassapput.

NAKUUSA-mi ilaasortat isiginnaarutit atorlugit ataatsimeersuartinneqarneranni eqqartugassat aalajangersimasut sammineqarput oqariartuutissanillu eqqartuisoqarluni, taakkulu sumiiffinni borgmesterinut Naalakkersuisunullu novembarip 20-ani apuunneqartussaapput.

Avannaata Kommunianit NAKUUSA-mi sinniisut siornatigut oqariartuutigisimasaat piviusunngortinneqarsimasut ilagaat Atuarfik Jørgen Brønlundip anitsiartarfiata asfaltimik qallerneqarnissaa, angajoqqaanik avittoqartillugu meeqqat tusaaniarneqartannginnerisa oqallisigineqarnissaa aammalu Ilulissani timersortarfimmi eqqiluisaarnerunissaq sulisullu inussiarnernerunissaat.

Allattoq assiliisorlu: Káte Hansen, khan@avannaata.gl