Qaammatit arfineq-marluk matuma siorna angerlarsimaffeqanngitsunut unnuisarfissap suliarineqarnera aallartippoq. Maajip qaammataagaa containerit arfinillit umiarsuakkut tikipput maannalu decembarip qaammataani tassa angerlarsimaffeqanngitsunut unnuisarfik naammassivoq, sisamanik ineeralik tamarmik immikkut marlunnik siniffillit. Ataatsimoorussassamik iggavilik, ini, uffarfiit marluk allaffillu initaralugit.
- Kommunimi misilittakkavut tunngavigalugit takutippaa, angerlarsimaffeqanngitsunik arlalinnik innuttaqartoq, ukiuunerani ajoraluartumik Nuummut aallartartut taqqavani angerlarsimaffeqanngitsunut unnuisarfeqarnera pissutigalugu. Taamaattumik nassuerutigissuarput angerlarsimaffeqanngitsunut unnuisarfik pisariaqartinneqartoq, borgmester Palle Jerimiassen oqarpoq.
Decembarip ulluisa sisamaani kommunalbestyrelsip angerlarsimaffeqanngitsunut unnuisarfiup malittarisassiassaa nutaaq akuersissutigaat, angerlarsimaffeqanngitsut oqortumik siniffissaannik qulakkiiginnarnagit aammali imminnut ikiulernissaannut iliuuseqarfiusumik tapersersorneqarnissaat kiisalu siunissami neriuutigalugu namminneq ineqalernissaminnut aqqutissiuunneqassapput.
Containerit Danmarkimi DC container-imit suliaapput, MASANTI piviusunngortinneqarnissaanut siunnersuisuulluni, Sannassisoq pingaarnertut sannassisuuvoq, sananernut, vvs-inut il.il. taakku saniatigut kommunimi politikerit, najukkami ataatsimiititaliaq kiisalu ingerlatsivinni assigiinngitsuni atorfillit arlallit pilersaarusioqataapput.
Angerlarsimaffeqanngitsunut unnuisarfik ullut tamaasa sap. ak. naallugu ammasassaaq taamaattorli nal. 09.00 – 11.00 akunnerani eqqiaaneq pissutigalugu matoqqasassaaq.
Inunnik Isumaginnittoqarfimmi sullissisunut saaffiginninnikkut unnuinissamut innersuunneqarneq pisassaaq.
