Aaqqissuussinernik unitsitsinermik isornartorsiuisut ilagaat Kangersuatsiami inuusuttunut susassaqartitsiniarluni aaqqissuussisartuusut. Inuusuttut decembarip 30-ani ataatsimuualaartinneqartarput, coronali pissutigalugu ukioq manna taamaatinneqarnissaa uggorineqarpoq.
- Taama inukitsigisumi matusiniaannarluni matusineq tunngavissaqarsorinngilara. Kaperlassiorluni aatsaat taama ataatsimoornissaq pingaartigigaluarpoq. Sooq Ilulissat eqqugaammata tamatta eqqugaassaagut? Upernaviup eqqaamiuusugut tikinneqajuitsigaluta sooq taama sakkortutitigisumik pineqassagatta, Kangersuatsiami inuusuttut sinnerlugit aaqqissuussisartut ilaat aperivoq.
Kangersuatsiami innuttaasut 145-t missaanniipput, taakkunganngalu inuusuttut 53-it missaanniittut ataatsimuualaartinneqarusukkaluarput.
Innuttaasut aaqqissuussisinnaapput
Borgmesteri Palle Jerimiassen isumaqarpoq, Avannaata Kommuniani coronamik tunillatsissimasut amerlanerunnginnerat qujamasuutigineqartariaqartoq, tamatumanilu angalasut Ilulissani ulluni tallimani uninngatitaasarnerat peqqutaaqataasoraa.
- Aaqqissuussinernik unitsitsiniaannarluni unitsitsisoqanngilaq. Uagut kisitta taamaaliunngilagut, nunarsuarlu tamakkerlugu suli sakkortunernik peqqussuteqarpoq. Isornartorsiuisutuulli oqarusunnaraluaqaaq, ajunngilaq coronartoqarpianngilaq ataatsimoorniaritsi. Kisianni taamaaliorsinnaanngilagut pissutsit ullumikkut allarluinnaammata, Avannaata Kommuniani borgmetseri Palle Jerimiassen oqarpoq.
Borgmesterillu erseqqissaatigaa, kommunip annertuunik aaqqissuussinernik unitsitsinera suli atuummat, kisiannili innuttaasut namminneq aaqqissuussisinnaanerat mattunneqanngimmat. Innuttaasut aaqqissuussiniarunik kommunip illuutai aamma atorneqarsinnaanerarpai.
- Ileqquliussimasat iluatinnaqaat, massakkulli pissutsit allarluinnaapput. Corona tuniluutileriataassagaluarpat angallannikkut aammalu napparsimmaveqarfiup kivissinnaasai qiviaraanni suli annertuumik sillimmartaartariaqarpugut, pingaartumik nunaqarfinni angallannikkut tikikkuminaatsuni. Qujanartumik corona tuniluutinngilaq aamma taamaaginnarnissaa suleqatigiissutigisariaqarparput. Taamaammat innuttaasut namminneq aaqqissuussiniarunik nakorsaaneqarfimmit maleruaqqusat malinneqarnissaat kaammattuutigiinnassavarput, borgmesteri oqarpoq.
Coronamik tunillatsissimasut Avannaata Kommunianiittut ullumikkut decembarip 29-ani pingasuupput.
Allattoq: Káte Hansen, khan@avannaata.gl