Ilulissani nutaamik mittarfiliortoqarneranut atatillugu, qimussit aqqutitoqaat atugassaajunnaarpoq. Taa-maattumik Munck Gruppen-ikkut piumaffigineqarsimapput allakkoortumik aqqusioqqullugit, taamaasilluni Ilulissaniik avannamut ingerlaartoqaqqissinnaalerniassammat.
Munck Gruppen aamma Kalaallit Airports nutaamik aqqusiornertik aallartissimavaat, sulisorpassuisali ilaat Kalaallit Nunaata avataani nikeriarsinnaajunnaarsimapput juullip kingorna matusinermut atatillugu.
-Qaartitassagut sumiiffinni marluniittut suli amigaatigaagut kiisalu nunagissaanissaq, aatsaallu tamanna naatsorsuutigalugu januarip naanerata missaani siusinnerpaamik pisinnaassasoq, Povl-Emil Olsen, Kalaallit Airports-imi suliamik aqutsisoq nassuiaavoq.
Kommunemiik Kalaallit Airportsilu suleqatigiipput, piaarnerpaamik aqqummik pilersitsiniarlutik.
