Kommunimi innuttaasut oqartussaaqataanerulerput

- Illoqarfiit siornatigut immikkoortitaarlutik sammasassaqartitsinikkut ingerlariuseqarnikuupput, 2018-imilu Peqqinneq Sunngiffillu pilersinneqarneragut illoqarfikkaat akimut suleqatigiittalermata innuttaasut akornanni oqallitsitsinikkut, pinaveersaartitsinikkut, sammisassaqartitsinikkut piorsarsimassutsikkullu katersuutsitsisarnerit aqqutigalugit innuttaasut oqartussaaqataanerat peqataatinneqarnerallu annertusivoq, Rigmor Villadsen Peqqinneq Sunngiffimmilu kommune tamakkerlugu ataqatigiissaarisoq naliliivoq.

Peqqinneq Sunngiffik sinnerlugu illoqarfinni Qaanaami, Upernavimmi, Uummannami aammalu Ilulissani aqutsisuusut, Peqqinneq Sunngiffimmilu ataqatigiissaarisoq Rigmor Villadsen kiisalu politikkikkut akisussaasoq Oqartussaaqataanermut Ataatsimiititaliami siulittaasoq Ane Marie M. Andersen ulluni sisamani Ilulissani isumasioqatigeeqqammerput.

Sulisut isumasioqatigiissapput
- Isumasioqatigiinnermi siunertaavoq Peqqinneq Sunngiffimmilu killiffik aammalu aqutsisutut eqqumaffigisassat pillugit avitseqatigiinneq. Tulliatullu illoqarfiit tikillugit Peqqinneq Sunngiffimmilu sulisut isumasioqatigiisinneqassapput. Aammalu najukkani peqatigiiffiit isummersoqatiginissaat periarfissaassaaq, Rigmor Villadsen oqarpoq.

Illoqarfikkaani sulisut isumasioqatigiisinneqarnissaat ulluni tulliuttuni Uummannami isumasioqatigiissitsinermik aallarnerneqassaaq, Ilulissani sulisut marsip aallartilaarnerani, Upernavimmi sulisut marsip qiteqqunnerani kiisalu Qaanaami sulisut marsip naanerata missaani isumasioqatigiissinneqassallutik.

- Immikkoortortanit assigiinngitsuneersut isumasioqatigiinnissaat ukioq 2020-mi pisussaasimagaluarpoq, Covid-19-imulli peqqussutit pissutigalugit tamanna piviusunngortinneqanngitsoorpoq, taarsiullugulu aqutsisuinnaat politikkikkut akisussaasuusoq peqatigalugu isumasioqatigiinnerat maannamut piviusunngortinneqarpoq, Rigmor Villadsen oqarpoq.

Peqqinneq Sunngiffillu politikkikkut Oqartussaaqataanermut Ataatsimiititaliap ataani inissisimavoq.

Allaaserisaq asserlu: Káte Hansen, khan@avannaata.gl