Qaanaarmiut qulit maskiinanik angisuunik angallassisinnalerput

Angutit arfineq-pingasut arnallu marluk sapaatit akunnerini tallimani Sisimiuni Aatsitassalerinermik Ilinniarfimmi pikkorissareerlutik Qaanaamut uteqqammerput. Pikkorissarnerminni nunagissaanermi assaassuarnik, nivattaassuarnik, assaassuarnik, usisaassuarnik aamma kussiornermi assaatinik ingerlatsisinnaanermut allagartartaarput.

- Allagartartaatut qulit Moriusami aatsitassarsiornissami allaallu nunatsinni mittarfiliornissani suleqataanissaminnut piareerput. Ataasiakkaat Ilulissani mittarfiliornermi suliartorsinnaanerminnik takorluuilersimapput, Mika Oshima Etah, Qaanaami Majoriami ningiuusoq oqarpoq.

Pikkorissarneq Sisimiuni Aatsitassalerinermik Ilinniarfiup, Dundas Titanium A/S-ip aammalu Qaanaami Majoriap suleqatigiinnerisigut piviusunngortinneqarpoq. Suleqatigiinneq Dundas Titanium A/S-ip Moriusap eqqaani sioqqanit aatsitassarsiorniarnissaanut atatillugu 2018-imi aallartinneqarpoq.

Qaanaarmiut tallimat siullersaallutik maskiinanik angisuunik angallassisinnaanermut 2019-imi uppernarsaatitaarput. Pikkorissarnissaagaluaq alla corona pissutigalugu siorna taamaatiinnarneqarpoq.

- Qaanaarmiut aalajangersimasumik suliffeqalernissaat anguniarlugu Qaanaami Majoriaq ukiuni kingullerni annertuumik suliniuteqarpoq. Qaanaami aasaanerani biilernermut allagartalinnik sulisoqarnissamut amigaateqartoqartarmat Qaanaami Suliffeqarneq Pillugu Siunnersuisooqatigiit ilaatigut suleqatigalugit Qaanaami najugalinnut biilernermut allagartartaarniarnermut pikkorissaaneq ilaatigut anguniarneqarsimavoq. Pikkorissaanerlu Qaanaami Majoriap ataqatigiissagaa iluatsilluartumik ingerlanneqarpoq, Thora Siegstad, Avannaata Kommunia tamakkerlugu Majoriami ingerlatsisoq oqarpoq.

Pikkorissartut Qaanaameersut februaarip 22-aniit marsip 29-ata tungaanut pikkorissarput.

Allattoq: Káte Hansen, khan@avannaata.gl
Assit: KTI