Qaanaami, Upernavimmi, Uummannami aamma Ilulissani innuttaasut soqutiginnittut najukkani ataatsimiititalianut najukkaminni qinersinissanut sassarnissaminnut imaluunniit innuttaasut kikkut najukkani ataatsimiititaliani sinniisuunissaat aalajangeeqataaffigerusukkunikku illoqarfigisaminni qinersivissami septembarip arfineq-aappaani nal. 19.00 najuukkiartorsinnaapput.
Najukkani ataatsimiititalianut qinersinissaq ukunani pissaaq:
- Qaanaaq: Atuarfik
- Upernavik: Katersortarfik
- Uummannaq: Timersortarfik
- Ilulissat: Piorsarsimassutsikkut Illorsuaq Sermermiut
Najukkani Ataatsimiititalianut najukkani qinersinerit Sullissivinni aqutsisunit ataqatigiissarneqassapput.
Qinerneqarsinnaatitaasut
- Innuttaasut najukkani ataatsimiititalianut qinigassanngortikkusuttut qinigassanngortinnertik qinersivimmut apuunnermikkut kingusinnerpaamik ataatsimiinnerup aallartinnginnerani illoqarfigisaminni Sullissivimmi aqutsisumut nalunaarutigissavaat. Kommunalbestyrelsimut qinersinermi maleruagassat aamma najukkani ataatsimiititalianut qinersinerni atuupput. Taamaammat qinigassanngortittut 18-inik ukioqalereersimassapput aammalu qinigaasinnaatitassallutik, tamatumalu saniatigut qinigassanngortittut ataatsimiinnermi qineqqusaarlutik oqaaseqarnissaminnut periarfissaqarput, Gerhard Jakobsen Avannaata Kommuniani siunnersorti oqarpoq.
Ullormi qinersiviusumi qinigassanngortittut ikippallaarpata peqatigiiffiit suliniaqatigiiffiillu najukkami ataatsimiititaliami sinniisussaminnik toqqaasinnaapput.
- Innuttaasut kikkulluunniit najukkani ataatsimiititalianut qinigassanngortissinnaapput.
Najukkani ataatsimiititaliat suleriaasissaat naapertorlugu najukkami ataatsimiititaliaq tallimanik ilaasortaqartussaavoq, taakkunannga ataaseq kommunalbestyrelsimi ilaasortaasoq kommunimut qinersinermi najukkami taaguunneqarnerpaasoq tallimaattut ilaasortaassallunni. Kommunalbestyrelsimi ilaasortat uku najukkani ataatsimiititaliani ilaasortaassapput:
- Ane Qujaukitsoq, Qaanaaq
- Knud Kleemann, Upernavik
- Sakio Fleischer, Uummannaq
- Aqqalu Jerimiassen, Ilulissat.
Najukkani ataatsimiititalianut qinersinermi taasinerit illoqarfigisani kisinneqassapput, najukkanilu ataatsimiititaliani ilaasortanngorlaat 2021-mi oktobarip aallaqqaataani inissititissallutik ataatsimeeqqaassapput.
Innuttaasut oqartussaaqataanerat aammalu najukkaminni ineriartornermi akisussaaqataanerulernissaat qulakkeerniarlugit Inatsisartut najukani ataatsimiititalianik pilersitseqqusillutik 2018-imi kommuninut pisussaaffiliipput.
Allattoq: Káte Hansen, khan@avannaata.gl