Upernavimmi Tasiusamilu kivittaassuassat toqqavissaat betonimik kuisat sivisujaamik kivittaatitaqaratik uninngasimapput. Suliarinnittussaqannginneq peqqutaavoq.
- Najukkami sanaartugassanik suliassinneqartartup sulisuni tamaasa atorlugit Upernavimmi ivigaasanik arsaattarfiliorneq ulapputigisimavaa, taamaammallu kivittaatip ikkussuunnissaa utaqqisinneqartariaqarsimavoq. Ivigaasanik arsaattarfiliorluni suliaq ukioq manna unitsinneqarallarmat sanaartugassanik suliassinneqartartoq kivittaammik ikkussuinissamut periarfissaqalerpoq, kivittaassuullu septembarip 21-ani atorneqarsinnaalernissaa naatsorsuutigineqarpoq, kommunip sanaartornermut immikkoortortaqarfianit ilisimatitsissutigineqarpoq.
Kivittaassuit aalisartunit piniartunillu pinngitsoorneqarsinnaanngillat, taakkumi umiatsiaaqqanik angallatinillu kivitsissutaasarput, soorlu aaqqissuussisoqassatillugu, itserngit qalipanneqassatillugit imaluunniit ukiukkut upernaakkullu qaqitsilluniluunniit singitsisoqassatillugu.
Tasiusami kivittaassuassaq Upernavik Kujallermiippoq. KJ Greenlandillu sioqqanik assartuut Holme atorlugu kivittaassuaq assartoriarlugu ikkussuunniarpaa.
Allattoq: Káte Hansen, khan@avannaata.gl